تبدلات علي حروفي..........وتبان غير لي راها
يمكن حيت كتار خوفي ........والنفس زاد هواها
تشكلات غير لي بغيت........وبدات تبين فعيوبي
وقبلها شحال تغريت.........يمتى يا نفسي التوبي
بحور لكلام هاجت ............مواجها تعلات عليا
كاع يامي لي دازت .............مازال سطل ونية
ضحكات عليا بشي زواق..خضرات عيون الحالة
طولات الرمش بلصاق.....ورسمات بلكحل خالة
قالت لي بلحن حلمتو........وبين الكلمات جلاتني
حالي انا لي رسمتو..........وبيدي باش درباتني
ميلي على ضلام لفكار....وشعلي شمعة المعرفة
وريني بقياسك أسرار..تحركي بلميزان يا خفيفة
سيري علىأرض الحال....لاتجرك الغفلة معاها
تحزمي بمعاني تقال...........لهموم الكتابة دواها
.................
وهاني دخلت جحور لمعاني..وطلعت سلوم لكلام
نزوق لحروف بلعاني....نتصالح من بعد لخصام
ماشي لخاطري كنت نعاني..ولا خاطلي عشت لغرام
حاولت نقادها من تاني................لكن سبقاتني لحلام
مانيش ياحروفي زهواني......منيش فلحرام خدام
لكن صبري عياني..............ياريت نعاودو ليام
..............
الساكن دواخلي يقول.............وانا بالهم مكتوب
شي قال مسكين مهبول ....شي قال سطل مكبوب
راني بشي هم مشغول.........راني للحال منسوب
ساكت والشوف يقول..........راني بلشواق ندوب
بديت حياتي مسؤول......وخديت زادي من طوب
أمالك ياليلي بالطول ..........أمالك بارد محسوب
خليت قلبي محلول..............بيض حليب مكبوب
حفضت شارات القول........نسمع همسات لقلوب
كتبت عمري منقول........وتبعت طريق لمجدوب
.............
قالو فلكلام نعبر...............وانا مسكين ماداريش
جراحي هي لي تهدر...........راني منتوف الريش
هاجتْ مواجك يا لبحر.........مابين لسطور نعيش
فعماق لحال ننضر.................وساكت ماندويش
كلامي إلا شكيتْ سطر..........يكبر ينبتْ بحشيش
ندير ليه كتابي قبر.............أنصبر.......مانبكيش
مجدوب بكلامي نحضٌر..سخون يقطر أُمايحرقنيش