سولت عْلِيَّ فِيَّ
مالقيت جواب منّي ليََّ
هايم فظلام ليالي
سارح ف الثلت لخالي
كنقلب عْلِيَّ
ف حروف خيالي
ساكن امسكون
حر امسجون
عاقل امجنون
حي امدفون
فصمت لهدره
فكلام لقهرة
سولت عْلِيَّ الريح
ما جاوب
سولت عْلِيَّ لحاضر
ولغايب
سولت عْلِيَّ لهنى
ولمصايب
مالقيت جواب
لكمرة ضركها سحاب
وشمع طفى
من بعد ما داب
حروفي
نصها داه الريح
انصها غطاه تراب
شايفني
تالف
عارفني
خايف
على حرفي ما يرجع
خا يف نهاري
ما يطلع
ليوم يسول عْلِيَّ
ف ضو لبارح
ف نجوم لبارح
ل كان يرسم على سما
بسمة
وعلى لما
نغمة
وليوم شايفني
ضلمة
بعينين لعمى
اسامعني زيزون
بودنين بكمى
باغيني نهضر
نجمع حروفي فكلمة
توصلني ل غدا
تفيقني من لحلمة
نزول بيها لخوف
ونفاجي لغمة
عارفني مسحور
كنقلب عْلِيَّ
ف دخان لبخور
ف مواج
لبحور
صبري قل
سحوري
ما بطل
بين ضلوعي حاتل
نسقيه بدمي
يزيد همي
متلفني
مكتفني
حابسني
حاسبني نقمة

طليت عْلِيَّ
ف مرايا مشقوقة
لقيت حروفي
مسامر
ف ضهري مدقوقة
شفتني نبكي
نشكي
ك نموت
دقيقة بدقيقة
عياني تخمام
خانتني حروفي
ابانت لحقيقة
لمن نشكي خوفي
افيمن ندير تيقة