قـصـة حـمـيـد الـمـهـبـول - فالـــزواج -

دوزت شهر تايه و تالف بحال لحمق
ولا شي واحد ضربوه بحجرة و تفلق
وليت بحال شي حولي ماماتتش وتعلق
ولي هضر معيا ، تيشوفني ديما مقلق
طلعات علي السخانة يوماين قبل الموعد
مشيت للصباغين لحانوت الحاج أحمد
ما لقيتوش ، مشى العمرة ، كان غير الولد
عبر لي المسكة الحرة ونص كيلو من العود
و دخلت لدرب أجانا ، و للغوفالة حسنت
لمعلم كيحجم ويختن و يحسن ولكن ديما سالت
هاهو فاس،فمراكش وفطنجة ، ديما مخنت
ومع لعيان،تاجر ولا عادل ولا حتى قاضي،معنت
قلبو كبير ولكن يلا تقلق غير برم ولا سلت
و فدريبة الحرارين دقيت على للا حليمة
ونا خايف متوجدش الأمانة ، حيت قليلة الكلمة
لكلشي كتعرفو ، ما تقول غير عالمة
خضيت من عندها تكشيطة وجلابة من نوع نعيمة
كان التوب دلموضة ، ولي ما لبساتو قديمة
و من سوق الصباط ، شريت شربيل ومضمة
طرزوهم لمين ومراتو وجارتو لمعلمة
ومن سوق المقري،شريت سنسلة وضبلونة للهمة
ومن البزازين شريت الثمر والحنة من بوعضمة
ومن مارشي حمرية ، عطاني مشموم ولد العمة
كلشي فلكوفر. قبطت الطريق و ماكلت حتى كلمة
كان نهار قبل العرس ، مشيت للقهوة بلا ما نعلم
دخلات ديك البنت محلقة ومها الحاج كيتتم
كلشي قال: لعروسة جات والعريس مشى يتحمم
قال الحاج: هي ديما ليا وداك السعاي دابا يندم
قالت : أييه ، أنا عندي غير الحاج لي كثير لفهم
كلسوبزوج كيضحكو ويتقهواو ويشيشو فلقنت
وماداوها فيا ولا فلحاضرين ، لا الحاج ولا البنت
وكنت قريب لهم كنقرا جورنال ومن الحاج سمعت
قال لها:سمحلي أحبي على الجرحة فوجك لي درت
البارح الكاميو نتاع الدجاج تحرق. ونا تقلقت
قالت لو: حجرة من يد لحبيب تفاحة. مضمة ونسكت
قال لها: غير بقاي معايا،راكي عمري فقت ولا نعست
ومضمة وشرتلة وكرميط لك عشت ولا مت
دوزت ليلة فلوطيل طويلة ، ومن قصتهم ما خرجت
فقت قبل الظهور ، فطرت ولبست وعطرت وحسنت
ومشيت لالجامع ،صليت مع نسيبي وليه عنقت
فليلة الرواح وصلني نسيبي للبيت وليدو بست
دخلت للبيت ، لقيتو مفرش و ضوو باهت
وحيت شت العروسة للقرآن كتقرا ، سعدت
حمدت الله حيت الفرحة ملكت روحي ونشطت
وقلت بهاد لعروسة ليام السعيدة حلت
و خوتاتها من ليام لحزينة ولكحلة ولت
دوزت ليلة زهوانية ولتعشاق سمعت
فقت فالصباح وخى على شخيرها ما زعلت
لكن ملي شت زوج خيال وجرحة غضبت
على وجهها باينين لي ، عليهم فالقهوة شهدت
خرجت من البيت كنجري ونا غضبان
لقيت لحباب و بها فالدروج أو هو فرحان
قال لي : صباحك مبروك أسيد السلطان
خفت نقولو ما شت ، يقولي هذا بهتان
غسلت و جهي بالزربة ورجت ونا عيان
لقيتها فايقة ومغطيا بيزار لونو لون الداليا
وقلت لها : واش أنا كافر ولا مسخوط والديا
قالت لي : مالك شاعل ؟ واش عضاتك شي حيا ؟
قلت لها:واش كاين شي حيا اكثر منك انتيا ؟
قالت لي : واش خصامك فصبوحي هديا ؟
قلت لها: لي كنعرف ، غير زلة دارتها لي يديا
و حيت ضربتني ما نبكي ، ما يبكي حد عليا
حيت رضيت بلهم ، ما رضى بيا
درتو عند رجلي ، صبح عند رجليا
قالت لي: براكا من لمثول ، وقلي مناش كتشكي
قلت لها: زتي وسعتي جروح شواكي
هرستيني وخى عرفت مني ، مشي من كشاكي
و حكيت لك حياتي بلا نفاق ، بلا كدوب وبلا شيكي

( إلى اللقاء في الفصل الأخير )

حـمـيـد الـصـنـهـاجـي