حروف الفنجان

وَنا وحدي وسط الناس
تْجَمْعت الهموم ونزلت على الراس
بْدا التخمام والحيرة
يْثَقّل عل لْنفاس
ينخر الساس
فضولي خلاني
نْكَلّبْ الفنجان
نقرا مافيه من حروف
...
ضبابة كحلة
مْخيمة فِ سماه
دخان وبارود فِ عْلاه
آ ش كَ نشوف؟
رجالة ونسوان
صبيان وحيطان
شي مطروح، شي فْ لكفان
شي رايب، شي لحْمو تعفن
القيامة نايضة
مّاليها ب الهموم غايضة
عيونهم ب الدموع فايضة
...
كَلَّبْتْ الفنجان
مَ جميع الاركان
قريت فيه حروف
تقاسي م الظروف
تبكي عل المجروح
هنا ولْهيه مليوح
تْشَيّع الشهيد
اللي كان عند مّيمتو
وحيد
تواسي المشرد
اللي م الوالي اصبح
مْجرد
ضرني خاطري
شحال بكيت
هزيت كفوفي لله وترجيت
ما ترجّاتو قلوب لَمْحنة
تزول لْمَحنة
تعود لبسمة
وْيعْلا بنادم
ب الهَمّة
حروف الفنجان
باقي كَ تَدْوي
كَلّبْتها يمين وشمال
آ ش كَ نشوف؟
حروف تايهة مع التيه
رادَّ راسها من ديك الجِّيه
عايشة ف لخيال
مربوطة ب حبال
هايمة ف لغرام
همهازين لخدود
ولعيون السود
...
آش هاذ الحال؟؟؟؟
لحروف وحْدة
وهي مْفرقة
هاذي مهلوكة ب لقَرح
وْلُخرى طايرة ب لفرح
آش هاذ لعجب؟؟
عش نهار ..تسمع خبار..
الحاصول
ما حاسْ ب المزود
غير اللي مْسوّط به
...
غسلت الفنجان
عامت حروفو
جرات ف الوديان
وصلت لَلْبير
للغدير
شرب منها الطير
غرد فوق الشجر والنخيل
أ نْشا الله
يكون الخير
يكون الخير
نجاة احسايني وجدة 10/8/2014