حْرُوفْ حَايْلَة


سْمَعْتْ بْعَيْنِيَّ
وْشَمِّيتْ بَلْسَانِي
وْدْوِيتْ بْوَدْنِي
وْگَلْتْ لَخْيَالِي :

اجْمَعْ الوَگْفَة
فَاقْ ارْگَادُ مَنْ نْعَاسُ
وَتْمَدَّدْ عْلَى شْرُوقْ اللِّيلْ
فَغْرُوبْ الشَّمْسْ
غْسَلْ وْجَهُ
بْرِيحْ حْرَامِيَّة
وْسَلَّمْ فَخْرُوجُ
عْلَى صْدَاعْ الغَوْتْ
وَدُخَّانْ التْبَرْگِيگْ
سْمَعْتْ
وَشَمِّيتْ
وَدْوِيتْ
وَگَلْتْ..
"آشْ فْهَمْتُوا مَنْ هَادْ لَكْلاَمْ ..."
*******************

حْرُوفْ صَايْلَة
بَالمْعْنَى مَايْلَة
مَكْتُوبَة سْطُورْ
حْرُوفْ حَايْلَة
بْلَمْدَادْ سَايْلَة
جَاوِي وْبْخُورْ ...
***************

أَنَا فَكْلاَمَكْ
تَايْهْ حَيْرَانْ
نْقَلَّبْ عْلَى مْعَانِيكْ
عَطْشَانْ
حَطِّيتْ سْلاَمِي
بِينْ كَفِّي وَالْلسَانْ
فْدْرُوبْ الحَرْفْ
رَانِي عَاشَقْ وَلْهَانْ
*******************

وَمْشِيتْ بَكْفُوفْ يِدِّي
نْسَلَّمْ بَگْدَامِي عَفْطَاتْ
شْكُونْ گَالْ
شْكُونْ يَشْرِي
هَادْ التّْمَرْ لَمْسَوَسّْ
مَنِّي
حْلاَوَةُ فْگَاعْ ضْرَاسِي
نَخْلَة ...
ضَحْكَتْ التّْبُورِيشَة
عْلَى رْوَاحْ مَجْهُولْ
بْعَضَّانْ السّْلاَم ْ
وْمْشَاتْ بِينِي صَوْتِي
كُحْبَة وَعْطِيسْ
وَمْشَاورْ حْزِينَة
مَاسْحَة هْمُومْ شَلاَّ ...
*********************

يْرُوبْ لَعْدَابْ
بِشُوقْ المَكْتَابْ
يَاكْ الزّْمَانْ يْدُورْ
العُگْدَة سْبَابْ
بِخْيُوطْ الصّْحَابْ
سْنِينْ وَشْهُورْ
****************

عَافِينِي
" يَامُولْ هَادْ لَكْلاَمْ"
غَيَّرْتِي بَالِي فِبْحُورْ
لَحْلاَمْ
لاَ أَنَا دْوِيتْ فِيُومِي
صْيَامْ
وَلاَ انَا سْمَعْتْ فِفْطُورِي
انْغَامْ ...
*******************

غَزَّاتْ فِيَّ
هَادْ الدَّمْعَة
مْشَاتْ بْلاَ رَجْعَة
وَسْرَحْتْ نْزَاوَگْ فِالنَّمْلَة
وَالنَّمْلَة
وَلاَّتْ نَحْلَة
وَالنَّحْلَة
وَلاَّتْ صَوْتْ
مَنْ دِيكْ الشَّهْدَة
مَحَلاَهْ رِيقْ
فدْخَالِي حْرِيقْ
فَاقْ
فَيِّقْ
فَاقْتْ النَّمْلَة
لْگِيتْ رَاسِي فالحَمْلَة
مْدَفَّگْ
سَايَلْ
بِينْ صْبَرْهَا
وبِينْ صَبْرِي
وبِينَاتْنَا سَرّْ
الَى گَلْتُ مَا بْقَى
للسَّرْ
مَا يْعَاوَدْ ...
******************

مَكْتُوبْ الدَّنْيَا
عَثْرَاتْ النِّيَّة
حْرُوفْ هَادْ السّْطُورْ
تَحْلاَ الكِيَّة
فايَّامْ مَنْسِيَّة
قَاطْعَة لَبْحُورْ
******************

نَكْتَبْ مَنْ كْلاَمِي
لْوَاحْ
نَقْرَاهَا فَاللّْيَالِي وَطْلُوعْ
الصّْبَاحْ
الَى كُنْتِ دَاوِي طِيرْ
صَدَّاحْ
الَى سْكَتِّ تَدْوِي يَّامَكْ
جْرَاحْ
****************

زَاوْگْتْ فرْحِيلْ التَّخْمَامْ
لاَ يَمْشِي فدْوَالَبْ
الحُگْرَة بْلاَ خْبَارْ
لاَ دَاكْ الرّْحِيلْ
كَابْدْ جْرُوحْ
تْخْمَامِي
وَلاَ دِيكْ الحُگْرَة
دَّاتْ وَجَابَتْ خْبَارْ
وَلاَ انْتَ يَا السَّامَعْنِي
مَا زَاوَگْتِ
مَا كَابْدْتِ
مَا گَلْتِ لْدَاكْ الرّْحِيلْ
بَرْكْ
الضّْيافَة ثَلْتْ ايَّامْ
فْزَاوْيَةْ التَّخْمَامْ
هَا عَارْ الله
زَاوْگُوا
كَابْدُوا
وَگُولُوا
لَرْحِيلْ تْخْمَامِي
يَبْرَكْ
فِضْيَافْتْكُمْ
رَاكُمْ مَنْ الدّْيُورْ لَكْبَارْ ...
*******************

يْفُوتْ لِّلي يْفُوتْ وْلاَ تْگُولُ رَانِي مَشْمُوتْ
وَالخَفَّة مَا تْنَقَّزْ الصُّورْ

فِينْ يْعُومْ الحُوتْ
فِينْ بْنَادَمْ يْمُوتْ
وَالخِيرْ العَزّْ مَا يْبُورْ
******************

رْوَاحِي سَلْبَة
مَا يْگَدْ يْرُوحْ
وَلْعْمُرْ شَمْعَة
بِالسَّرْ تْبُوحْ
الدَّنْيَا دَرْجَاتْ
مْخَلّْفَة وَسْطُوحْ
وَالبَالْ غََيْمَة
سَاكَنْ الرُّوحْ
********************

مْرَايْتِي هْبِيلَة
لاَمَتْنِي فْصُورْتِي
مَا لَمْتْهَا
هِيَّ واگْفَة
وَأنَا غَادِي
شَدُّونِي
رْمِيوْا العَارْ عْلِيَّ
شَدُّوا غِيرْ خْيَالِي
يْبَرْگَمْ
فْمْرَايَةْ صُورْتِي
بِحْدِيثْ
يَغْمَسْ فَدْوَايْتِي
رْمُوشِي اقْلاَم ْ
مَا تْلاَمْ
سَاعَةْ الكَتْبَة
حْرُوفْ اكْبَارْ ...
******************

بِسْمِ اللهْ بْدِيتْ
وَنْگُولْ عَادْ بْدِيتْ
نْشُوفْ لَكْلاَمْ نُورْ
شحال انَا عَدِّيتْ
حْرُوفِي وَبْكِيتْ
وَشَمِّيتْ مَنْهَا عْطُورْ …
********************

حْظِيتْ غَرْسِي
مَنْ رِيحْ الشُّوفَة
وَرْبَطْتْ جْلاَيَلْ
الرِّيحْ بِشُوفَةْ
وَمْشِيتْ نَسْقِي
لَوْرَاقْ الَمَلْفُوفَة
وَكْبِّيتْ سْلاَمِي
يْطُوفْ طُوفَة ...
*******************

حَدِّي هْنَا
رَانِي عِيتْ
سَامْحُوا هَادْ الرّْحَا
لِّلي طْحَنْ حْرُوفِي
فْهَادْ لَقْصِيدَة
مْعَانِي مْسَامَحَة
رِيقْ جُوفِي
مَا گَلْتْ
مَنْ كْلاَمْ
حَسْبُوهْ خْرَافَة
وْلاَ مَعْقُولْ
عُمُّرْ ظَنِّي مَا خَابْ
وَلاَ يْخِيبْ فْمْسَامَعْكُمْ
بِخَيْرُ
فِمْعَانِيهْ
بْشَارْ .