منتديات دواوين الثقافية و الأدبية

قصيدة زجلية مشتركة مع الصديق الشاعر نصرالدين خيامي بلمهدي(الغريب) وابتسام الصديني(البوهالية) تحت عنوان"الحرف فهم الكلام قصد ومعنى

الحرف فهم الكلام
قصد ومعنى

البوهالية
******
بديتيني ف سطر
خليتيني ف جوج سطورة
قلت الجواب كافي
صبحت صباحي فمطمورة

الغريب
******
هيجتي شوق سطوري
والحروف تزمم
تكتب كلامي
نبغي يخف تقالي
وتنشدي موالي
انا مجدوب
عالحروف ندوب
قالو : بوهالي
شكون يفهم المعاني
إلى كان الحرف
خوا الحرف
فهمي كلامي

البوهالية
******
انا نفهم المعاني
وتركت عقلي وركز
وداني نخيم بالعقل
ونخفف ثقالي

الغريب
******
الحروف سر
ونت يا للمة الحروف
نبغيك تكوني بجوري

البوهالية
******
بجورك؟

الغريب
******
نربيو حروف الكلام
ونصنعوا من حلام الكلام
يجمع بين حروف و معنى
ويكون بين الحروف سر ونغمة
ونا فشوق زجال
يا من ربطات هبالي
فصرف بوهالي
جمعات حروفي
فصواب وافي
صوت نغمة
واحساس دافي
لا تخليني بين سطورك نجري
يا عشير موالي

البوهالية
******
فكرتيني
ف كاع لي داز
فحرفي الاول
حرف متشوق باز
حرف طاير حراز
حرف موصون بسراج
حرف مضمون
مكنون
مسرور
سريع تنقاز
سهام فاتت بالقلب
وحلام عليها كنت نقلب
ضاعت ضايعة ف مسرب
ايييييييه
فكرتيني فسنيني راحو
فدموع عليه طاحو
فشمل جمعو الكلام
فشمل شتو الحكام
عاديني بكلامك لا تواسي
خليني نبكي
إلى طار نعاسي
فكرتيني

الغريب
******
فكرتيني
الحروف بحر عميق
ونا مقهور
فسر الكلام مطمور
صبت ف جواري رفيق

البوهالية
******
ماليه تفسير
غير بير عميق
من كلام رفيق
كان ف القلب
صبح صديق

الغريب
******
فكرتيني
واش الحرف يجمع الشمل
إلى قصد حال البوهالي
طامع فجود الرفيق
يحن على قلب الحرف
الهايم ف سر هبالي

الغريب
******
واش ما ترض قاصد
ليك مقصود
قرا فيك لمان
وعشق الحرف المنشود
هزني ريح
على صوت
حنين من حروفي
نظرة تاقبة
وحروف بوهالية
سكنات هبالي
أنا طاطيت
وحروفها ملكات كياني
يمكن تكون تحقيقة
ولا حلمة تنسج حلامي
طايرة بين الحروف
باغيك تقراي ما بين حروفي
وتفكي سر كلامي
طال شوقي
وحبيب حرفي غاب
خلاني على عتاب
واقف نتسنى عالباب
نشد موالي ب حرف منشود

البوهالية
******
لله يهديك
خوفي عليك انا خوفي
يهزوك مواج البحر
و يطيرو بيك حروفي
وريحي عجاج
تسير بيك
وطوْفك طوفي
رجع بخطاوك لور
و لا تقل شوفي
وحكم بسر مغرور
ونجم معروفي

الغريب
******
الله الله
حروف البحر ما تغلبها مواج
ولا يهزها عجاج
تشق الريح
وما تعرف تعواج
فالحق نيشان
ما ترجع اللور
ما يكسرها خوف
ما يحكم فيها حاكم

البوهالية
******
عندها حاكم بالاوهام
يلجم الحرف بالتمام
وينسيني ف الحاضر ب التخمام
العقل حزام الواحد
واللسان حزامهم بجوج
اجي عوم ف بحري
جري وجاري
قدف ب اسراري
ولا تقول ناري
سرح ف هوالي
زمم قوالي
ونفكرك ف زماني
ونصدرك ف هوالي

الغريب
******
شفت نجمة
ف بحر الشوق
نور منور رصامي
حرفي ف تزمام حرفك
ينشد كلام
ويخفف هوالك
وهوالي
الراية حمرا
وحروفك تدمي موالي
الى غابو الرفاق
حرفك يسند حرفي
وتخفاف هوالك وهوالي

البوهالية
******
جيني ب حرف
فيه وصف وصرف
علاش لحالي تعطف
كيفاش لهوالي وب لخف
جديد وبالي تصنف
صديق وغالي تلكف

الغريب
******
الحرف فهم الكلام
قصد ومعنى

الشاعر : نصرالدين خيامي بلمهدي ( الغريب )
الشاعرة : ابتسام الصديني ( البوهالية )
قصيدة مشتركة ,,,, يتبع

الشاعر نصر الدين خيامي
بلمهدي اللي هو
الغريب
والشاعرة ابتسام الصديني
و اللي هي البوهالية:

بسم الله ما شاء الله عليكم
الله يعاونكم ع الحروف
وتربية العروف حتى تكبر
وتكبرف زدهاركم وتشب
ف المعنى
ختكم مباركة شكور

نص جميل وممتع
زواج فني للكلمة والصورة الشعرية
دام لكما التألق والتميز ... مودتــــــــي

» الحرف والكلمة
» الحرف جدام...
» وجع الحرف
» الحرف
» الحرف وتخمامو

منتديات دواوين الثقافية و الأدبية

منتديات دواوين الثقافية و الأدبية

الحرف فهم الكلام..قصد ومعنى