سيف الوقت
الوقت هو الوقت...
عقارب سوايعو محققا على نغمات هواه
بغيتو شي نهار يلا راحت شَّمس
يغرق ف ظلام روحي
يتكمط ف بردها
يبقى معلق بين الليل ونهار
نتفرج عليه كيموت ليه لكروح
مابغيتو يحضيني ف الرايحة وجايا
ما بغيتو يزحمني يلا فقت...
بغيتو يرحمني من خْليقة العساس
للي مطرق مسامرو ف ظل داتي
وقت ما فرَّطْتْ
تكرطني عقاربو ب سمها
ويسرح معايا الوقت ك الموت
نتعكز على ظلي و نوقف
نتحتت معاه كيف ننقص من طولو ...؟
كيف نحفر على ريحة البركة ...
يلا بقات َف جدورو ؟ !
كيف نزرعو حسن نية ...
و كيف نحصدو تدبير؟
حار تخمامي ومشيت ليه
كان واقف على راس ساعة
كيمضي سيفو
عييت نحوم عليه
مرة نغمزو مرة نمعني عليه
ما حتتني ما عطاني جواب
تجبرت وطغيت
قطعت راسي و رميتو
قررت ندير... مادار حد :
ن قاطعو...
نْقَطْعو ...
نقطع ليه...
قطع رجايا
قطع ظلي من داتي
دخل سيفو لجواه
وسلني مني
ْعصر ظلي
نشرو تحت رموش الشمش
غزلات ليا لباس كحل من ظلام شعري
عرفت راسي غاديا غاديا
حلفت ما نمشي حتى خير نفعل :
قلت ل للي تْحَشْ ب سيفو وما حس ي فيق
للي زرع وقت وحصد شوك يقْلب حَرْتو
للي قتل الوقت يوجد دِيَّتو
للي قهرو يوجد حمِْيْتو
للي هبل ليه يتلفو ولا يْوَلْفو
سمعني ونشر ظلي تحت رموش الشوف
غزلات رموش من صبري قصايد تهدر ...
َفَّيْق حالي دوك النايمين
للي على حْقيقت الوقت غافلين
فاق كلي من غيبتو
شم ظلي وعرفو
لبسو ومشى يجري
تعثر ف شوك وحجر
تجرح وسال منو شلا صبر
جاه زهر كيتعتر
قال ليه :
شوفني, ياك أنا زهر
كن كان عندي زهر ما نتقطر
شد معايا الوقت من الساعة للي ضاراه
نقطعوها ويبقى وقتنا هاني
نطفيو دوك ضواو
الشاعلين ف البال من زمان الوقت...
يمكن غدا يشعل ضو جديد ف ظلمة ذ الزفت
ونلقاني فقت من عْصير الوقت
و نقطعو ما يقطعني
الرئيسية
موضوع: سيف الوقت 
الأحد 1 يوليو - 21:27
