فتحت عيني ف الزمان

لقيتو مشمر عل دراعو


فرغ لمحان

وحرك شراعو

تبكمت لعين
وخرج لسان

والحلم مشى ف تباعو


الدلال جمع وطوى قلاعو

***

بكري……

شراو لي شراو

باعو لي باعو

حنززت ف ليام

وراتني النيب الطرفاني

قلتلها ف الكتب تلقاني

دم سايل
هم حايل

عراق هارق

كل حرف

لاسق ف سارق

***


شديت لقلام سلاح
والحروف رماح

وسرجت خيالي

وشرعت باب دماغي

وهجرت ف الثلث الخالي

***


لقاني كلب نباح

قلتلو مامسالي

فكدية عقلي كلست نرتاح

ونزلت ثقالي

***


رعفت سالت مني حروف

فاض بحر ف خيالي

وركبت عليه
وسرت نهتهت ك البوهالي
***

فعيني تكلب البيض
عل الكحل

دماغي ف نياب الوقت وحل

***

وخرج نيابو
وكتب كتابو

خويت عليه ما جوفي

قال:

كلمة:
حلمة:

ف..ظلمة

عينها من حر البرد

زرقة

دمجت ف لساني

فرغتها ف طبسيل
الورقة

دات معلقة
ف عود ليام راشي

روح مشنوقة

كسدة مخنوقة
مكفنة
مخيطة
بالتواشي

الدم فيها مطعون
لحمر مابقاشي

ريحة الشحمة..ف..ليام
***

نزلت عيني
لقيت من لهموم عرارم

عليتها
سبع زكارم

رغبت حرفي

ملي عرفتو عارف وقارم

***

زاد وجاعي
ملي دخلت لسوق لكلام

الفهامات مطلوقة بلا لجام

فين ما مشيت
ياراسي تلقى ضالم

***

زكيت تقطع حرف

سمعت غوتو ف القلب

قال:
العقل تسلب
الزمان غلب
القنديل
تقلب
بقيت ف ضلمة
مكحل بالعمى


سلاس….

مد يدك يتقطع

لاودن تسمع
لاقلب وجع
لاعيت تقشع

مالقيت حد قدامي

وكيت على حيط خيالي
وهزيت تخمامي


حفرت قشتي
النية عنايتي

حسيت ب وجع

ف دواخلي
سالت حروف من جبهتي
عل وجهي تلمع
نطق فالي

ب كلام بلا قفالي
باركا من الصدع

***


الارض حشمانة

كانت على سبة
عطاتها للسكات
برق ما تقشع

السما حاجبة

لي مات مات
لي فات فات
لي عاش لسانو
تبلع

***

ملي شفت ماشي د الله الله

رغبت حرفي
يشوف من ضرفي

***

يوزني ويغنيني
مرة مرة يواسيني


يكتبني ويهجيني

يغطيني ويعريني

***

قبالة حبابي

قبالة عدياني

قبالة صحابي

بغيتهم يغرسو ف الوقت
حروفي نيابي
كما غرس ديالو في

قبل ماندوب ف ترابي
وتبقى منسية...

المفضل الياموني طنجة 2010/12/29

قبل ماندوب ف ترابي
وتبقى منسية.........................


إتنسى مول المال
وما إتنسى مول لكلام

الاخ المفضل الياموني أحساس جميل لكلام لمرصع إدوم وعيش تحياتي

حرفي..ونياب الوقت
اخي العزيز
والاستاذ الجليل
المفضل الياموني
حرفك
مصقول
داك لوتاد
متول
يحكيوه لجداد لحفاد
والله يرحم عليها
السي عبد السلام
اتنسى مول المال
وما يتنسى مول لكلام
وانا غادي انكولك

تفنى لعقول
وتدبال لجسام
ويبقى لكلام
شكرا لك اخي على الابداع وعلى النفسك الطويل

أخي واستاذي العزيز المفضل الياموني
شكرا لك على هذه القصيدة المتميزة
استمتعت بالكلمة الموزونة والمعتى العميق
لك أبهى التحيات

استاذي الكبير السي عبد السلام البوعليوي
مرورك كقطعة ثلج وضعتها على صدري في فصل الصيف وانا صائم.
حفظك الله ...ياغالي.

الجليلة والاخت الطيبة فتيحة رشاد
هو مرورك وحروفك الجميلة
ووجودك يحيي النفس ويسقيها
شكرا لك دائما ولك مودتي كما هي..

الحرف مشمر نيابو
و لبوح فاتح بابو

تحياتي أستادي على هده الزجلية
دامت لك محبة الحرف و الكلمة
منصور لعميري

المبدع الكبير سعيد محمودي
صراحة فضلك لن انساه
انت عنواني انت ساروت بابي
مرورك كعيد انتضره

سعيد ياسعيد
حرفك براد
عل صينية
نهار العيد

تحيتي لك...اتمناك صديقا على الدوام...واتمنى لك كل ما تراه جميلا في خيالك....

الصديق الغالي والزجال الطروب ابراهيم الرامي كلامك نفذ الى وجداني كماء عذب في فصل الصيف في شهر رمضان بعد الفطور..

الشاعر والاخ منصور لعميري
سنة سعيدة عليك وعلى كل العائلة
شكرا على مرورك الذي عطر حرفي.
لك تحيتي ومعزتي التي لا تضمحل..

اخي الفاضل المفضل الياموني قصيدة في منتهى الروعة نتمنى المزيد ان شاء الله
تحياتي محمد منار

الاستاذ والمبدع والاخ ثلاثي ميلود
شكرا على تفاعلك مع حرفي المتواضع
وشكرا على كلماتك الرقيقة..دمت مطربا..ودمت نجما نضيء بك ليلنا..مودتي واحترامي لك كما العادة.
دمت لنا ولحرفك الطروب..

اخي واستاذي محمد منار
اعجابك بحروفي هو تشجيع سيدفعني للبحث اكثر عن الافضل.
سعيد بك يا مبدع.