رْيُوسْ الْمَعْنَى
1)رَاسْ الدَّرْبْ
عَيْنْ حَاضْيَه
وَرْدْ ذَابْلء
بُولَه طَافْيَه
و رَاسْ مْقَدَّمْ شَاعْلْ
2)رَاسْ الْحَانُوتْ
عْطُورْ و رْوَايِحْ
الْعَيْنْ ف الشُّوفَه تْحِيرْ
قَلْبْ عْلِيلْ و نَايِحْ
و عَشَّابْ مَاعْرَفْ آشْ يِدِيرْ
3)راس السوق
ﮔـرﮔـاع خاوي
خوخ قالو يداوي
الرزة على فم الكاس
والقاع نعناع لاوي
4)راس العام
الحبشي عطاها للقصارة
قدَّام الربح عام طويل
الدنيا ماشية زربانة
وحنا نرقعو نهارنا باليل
5)رَاسْ الجّْبَلْ
غْنَانْ مْقَلَّزْ
طْرْشَانْ تْخَاصْمُو
الْحَقّْ فِيهُمْ يِحَنْزَزْ
كُنْ تْسَامْعُو كُنْ تْفَاهْمُو
6)رَاسْ الْخِيطْ
كُبَّه من لَحْزَانْ
و رَأيْ مْخَبَّلْ
مَلْقَى طُرْقَانْ
آشْ مَنْ دَرْبْ يِوَصَّلْ
7)رَاسْ الْعِينْ
دمعة مالحة بين كفوف
قلب شاكي ولهان
جغمة ما بردت جوف
ما روت سبول عطشان
8)راس لمحاين
ك عود الشقا عساس
ف هوايع الدنيا يخمم
لأخر مريضو ماعندو باس
ما ف الهم غير اللي يفهم
9)راس الما
فكرون عاش بخواضو
ديب حالف بحلوفو
وخروف ساكنو خوفو
الصفا هلال رمضان عليه نطوفو
10)راس الحربة
جبهة وسناطح
لسان ماضي وسحاسح
ف الأصل لبلاصة ماهية ليه
والعاهد ما يوفى بيه
11)راس لحمق
بيه يتقاس لواد
يكب الخنشة ف الخنشة
الفروج طالع هواد
كل خوية يلقط عشاء
12)راس المال
جيب عامر
وعقل يصفر
السومة شحال ف الجيب
ولحلال الله يجيب
(13راس الجمل\ راس الجمال
اللي ف راس المغزل
ف راس الصوفة
واللي ف راس المنجل
ف راس السبولة
14) راس التومة
الفم مشتاق
القلب ما تاق
قلت نسد الفم
قالو ما رضا بينا
15)راس الشهر
كليان مسهوت
الحالة على قد الحال
هارب من مول الحانوت
قليلة هي فلوس لحلال
16)راس بنادم
……
……
……
…. !؟
احميدة بلبالي
تيفلت
المغرب
الرئيسية
موضوع: رْيُوسْ الْمَعْنَى للزجال احميدة بلبالي 
الجمعة 24 فبراير - 0:30
