وقتاش نبدا ف الحياة..؟؟
ــــــــــــــــــــــــــــــــــــ
أح...تانحس بشي حراق
تانحس بقلبي بغى ينبض..
تانحس بيا مني
تانبغي نزهق
فدواخلي تانتنفض..

ياليلي يالايلي..
تانبغي نخلف
تانعكل غ ف جلايلي....

اللي حدايا..


تانعيط....
ملي تانقرا وماتتنفعني قرايا
وتانسمعني غير أنا
صوت تايقول:

دوز ولا خليني ندوز..

بغيت نقطع الزمان المقزوز..
نفتح اللحم ونهرس لعضام
لمكالياني

خلفة لقدام
كافيه ..باش ندرك لحلام...

ونبت شجرة ثمارها معاني
انا هنا فيا مخفي....
عامر بك..لا تزيد علي نقطة..
من لوجاع
لي في يكفي.

وقتاش نفيض..نفوتني ..
نفوت حناجري..
نوصل ليك..
نشوفني فيك..
مانبقاش بك منفي..

تنحس بحصايري...
حاطين يدهم على نيفي..

مخنوق ..
يدي مكثتفها يدي..
وعيني لفوق..

تانشوف غير ذاك الشوق..
وعقلي غاب عليا..
مسروق..
على ظهر اللذة..
تايقطر من فم الدوق...

شكون قال الشوك مافيه نفع..؟
يقولي منين خلق الورد
شكون شاف الزين وقال شبع؟
شكون يحسب نفسه
مايغلبه حد
ف الدنيا قاد يعيش سبع..؟
السبع ملي تايهرم راك تاعرف..
اش تايدير به القرد..

رني سمعت ماسمعت ..شفت ماشفت..
فهمت مافهمت..واسكت..
وسرت نبركم
ملي تايصوط فيا الريح..
تانطل من شرجم
وعيني عليا مفتوحه

تانخرج معاه تانشوفني ..قدامي..
بيني وبين راسي باب..
من لخشب..لوحه حدا لوحه

وبصبعاني تانحسب حلامي

واحد جوج ثلاثة والقسمه الرابعه
روح مدبوحه وكبدة مجروحه

وتايتخربقلي لحساب..
ملي تانغلق عيني
جهة بره
قدامي ..جسدة
معريه مفضوحه...
وتنلقاني غريب وسط..
جماعه من لصحاب...

المفضل الياموني..

الأديب المقتدر زايد التجاني اسعدني حضورك الوارف هنا ..
واسعدتني اطلالتك بعد الغياب اتمناك صديقي بالف خير..
كامل تقديري وودي ..

الصديق المفضل الياموني
قرأت لنا هنا نصا يحمل في داخله مخاض الميلاد
فكان المولود نسق فني جميل
دام لك نفَس الابداع
مودتي