منتدى الزجل المغريبي
قصيدة العشرة لبنعيسى الحاجي
العـشـــــرة


بالله عليـك يا قلبـي
من حياتـك ليا ما حكيـتِ
واش ما سبـق لك ف العشـرة
رافقتِ لصحـاب

جاوبنـي يا قلبـي
شحـال هذي معايا ما تكلمـتِ
منعـم ف لوحدة لابد هناك اسبـاب

قلبـك يا شخصي معاشـر عـقلـك
ما هو وحداني
وعاشـر ف حياتـُه كثيـر نسـاء ورجـال
لعقـل تيآمـر وقلبـك جـرّب
صغيـر وفقانـي

من عرفـك ف لهنـاء والخيـر
يحبـك ف الحـال
ومن عـرفـك محتـاج ينفيـك
يقطـع كلامـك بلعانـي

النفـاق طغـى ع لقلـوب
اجتنابـُه مُحـَال
وزاد ان تشـر اصبـح موضـى
جاهلـُه تحتانـي

النجـوم قلال ضوهـا
وظـلام الليل طـوال
يا شخصي واش نلبس ثـوب
لونـُه ما وثانـي

لبحر زال صمتـُه
سخّر امواجـُه تحرّر الرمال
هـاج ف الصيف رافـض
من كاشـف عـورتـُه بلعانـي

كيـف تصدق
من كانت في نغمتـُه حلاوة
مذاقهـا اليـوم بسـال

عـادت لغنم ترقص للراعـي
ينشـد لها أغانـي
ف صوفتهـا تتّجـار
ترعـى في حقـل
ربيعـُه شعشع وطـوال


لمسـارب مهلوبـة
ولمسالك عشاقهـا قـلال
انتصر الغـزو ف ضعـف الأصل
القصـد رهبانـي

غفلـت لبصار ع لمناكـر
و لمحـرم عاد حـلال
والبكمات كتعاني ف جهلهـا
من القـوت الربانـي

الخرفـان اختلفـت سلالتهـا
ولفحـل من وحدتـُه يعانـي
الأسُـود هجمت على وكارها لقـرود
ترجـع لحالهـا موحـال
يا شخصي واش نعاشـر ف رأيـك
أو نبقـى وحدانـي

شكر الاخ السي سعيد محمودي على إدراج هذه الزجلية الجميلة للأخ السي بنعيسى الحاجي
تحياتي

تحيتي الخالصة
لك اخي محمودي سعيد
وشكرا لاختيارك
ومجهوداتك الجبارة
والشكر كل الشكر
للكاتب بنعيسىالجاجي على هذه القصيدة

شكرا لك أخي سعيد محمودي
وتحيتي للمبدع بنعيسى الحاجي