حمار الليل
كَالو مسكين
ضربو حمار الليل
تمشى وهو كاعي
دوى وما هو واعي
مد يديه وهو نعسان
خوى لمكان
دار لمان
ف اي كان
حمار الليل
كْلب ليه لمجاج
نوض عليه لعجاج
لبسو لحلاس
خلاه ضحكة
بين الناس
كلامو فيه لهواس
بنادم منو ولّى عساس
حمارالليل
ما بقى يضيف لغافل
زاد عليه لعاقل
مول لمال ولمْقال
ارجع م اصحاب لحال
داوي ب لمُحال
ناوي يغير لحوال
كَالو قاسو لهبال
وهوليهم ما راد لبال
حمار الليل
ورثناه من جيل ل جيل
باقي راكب لخيل
عل لعباد يدور ويميل
فيهم اللي قلبو عليل
دموعو ديما تسيل
واللي صبرو قليل
ما قادر على همو الثقيل
واللي مكوي ب نار لخليل
ايامو كلها ليل
حمار الليل
بقات فيه غير السمية
لحيلة فيه غلبت النية
اللي بغى يكسب الدنيا
يلعبها عليك وعليا
يدير ف راسو مزية
ياخذ اللي بغى
ويلوح ليك شوية
ويكُولو مسكين
ضربو حمار الليل
نجاة احسايني 4/6/2014