مجدوب زماني

حتى شي بلخير مايبشر
ولا خبار زينة فوطاني
قريت لكتاب ملخر
لقيتني مجدوب زماني
غاضني شبابي لي ضاع
ماصبت في زادو معاني
بقلبي شعل جمر لكانون
غطاه الرماد
مابان دخاني
قالو عرب ليوم رجالة!
وسط فمي سجنت لساني
تجار لكلام لقوالة
ببهوتهم بارت أرضي
و يبس فداني
لكبار لقوم ينباع لقول
عسل لكلام
فشهد لمعاني
وزنو لعقل بقشور لفول
مالت لكفة ورجح ميزاني
نطق كبشي وسط لخرفان و صاح
على الثعلب الراعي مرتاح
بالو هاني
والذيب من كلاب الراعي
ماسمع نباح
جرني من وسط لقطيع
فرزني وكلاني
ضاقت بنا و زاد الضيق
و لقلم بكا بدموعو وبكاني
لغذر من مسلم ما تزيد تيق
واش تترجا من خمار الزهواني
تخربات لبلاد بولادهم وعفنهم فاح
لي بالرشوة ولخواض
من سبورة الحق محاني
يا خوفي من ظلام الليل إلى راح
وينكشف كل خوان رهباني
إنفضح للخلق فعلو بصاح
على السلب و النهب راسو حاني
شحال ما طال الليل
يطلع الصباح
و تنطق لبلاد
ولد الخاين باعني
أو ولد لمسكين فداني
يا لي دمك روا ترابها
من حقك تقول
التاريخ نساني
وقفتي لغريب
و حميتي بوابها
جا من فتح ليه لباب
نكرني ورماني
لازم عند لفورا يبدا لحساب
نشوف الحق
راكب ع الباطل بعياني
تسحا السما
ويتلاشا الضباب
تخضار أرضي
وينور جناني
ويفيق الراعي لمجمع الدياب
ويعيش لخروف وسط قرانو هاني

ع الفلالي

الاخ الفاضل الاستاذ عبدالرزاق الفلالي تحياتي الصادقة ومزيدا من التألق والعطاء