مجدوب زماني

حتى شي بلخير مايبشر
ولا خبار زينة فوطاني
قريت لكتاب ملخر
لقيتني مجدوب زماني
غاضني شبابي لي ضاع
ماصبت في زادو معاني
قلبي شعل جمر لكانون
غطاه الرماد مابان دخاني
قالو عرب ليوم رجالة!
وسط فمي سجنت لساني
تجار لكلام لقوالة
ببهوتهم يبس فداني
لكبار لقوم ينباع لقول
عسل لكلام فشهد لمعاني
وزنو لعقل بقشور لفول
مالت لكفة ورجح ميزاني
نطق كبشي وسط لخرفان و صاح
على الراعي الثعلب مرتاح، بالو هاني
الذيب من كلاب الراعي ماسمع نباح
جرني من وسط لقطيع فرزني وكلاني
ضاقت بنا و زاد الضيق
و لقلم بكا بدموعو وبكاني
لغذر من مسلم كيف تزيد تيق
آه من داك لخمار الزهواني
تخربات لبلاد بولاد لبياعة الصحاح
لي بالرشوة ولخواض محاني
يا خوفي من ظلام الليل إلى راح
وينكشف كل خوان رهباني
إنفضح للخلق فعلو بصاح
على السلب و النهب راسو حاني
شحال ما طال الليل يطلع الصباح
و تنطق لبلاد ولد فلان باعني أو ولد لمسكين فداني
يا لي دمك روا ترابها
من حقك تقول التاريخ نساني
وقفتي لغريب و حميتي بوابها
جا من فتح ليه لباب ونكرني ورماني

ع الفلالي

اخي الفاضل الاستاذ عبدالرزاق الفيلالي جميل ما جادت به قريحتك وما فاض به قلمك محبتي وتقديري

أشكر كل الأساتذة الكرام لكم مني حالص المحبة والتقدير

أشكرأستاذي الكريم لك مني حالص المحبة والتقدير

نفس عمميف وتالق عريق جميل ماجادت به قريحتك الاخ الفلالي مجدوب زماني ..