منتديات دواوين الثقافية و الأدبية

وَشْمة ف مراية الزمان

وقفت وَقفه طايحه
طَحت طيحَه ناشْفَه
روحي فَ اسراري، سايْحَه
عطيتْها جَهْدي
عطاتني ب لَگـفـا
نْقاوم لَمْواج الجَّايحَه
عَقباتْ فَ وَجهي واقْفَه
صَلْْيَاتْ لَغْدَرْ
عْلَى ظَهْري مْرادْفَه
واقْفَه، طايْحَه
طايْحَه واقْفَه
فَ كْفُوف لبْحَر
لاَحَتْني لَريَاحْ بْلا عَفَّه
فْ دْواخْلِي دْوَى الرَّعد
قفزو فيَّ عروگ الرَّجْفَه
****
الْحِيرَه بَنْتْ الصْبَر
ذَوْبَتْ ضوْ لََعْمَرْ
عْلِيك يا رُوحِي
بَ الرَّجْا
وعْلِيَّ بَ الكَلْفَه
نَتْسَلَّف دْمُوع لَغْمَام
تكون عويني ع اليام
تغسل غيس قَهْري
نَنْسى
لاَّ وَ اللَّهْ ما نَنْسى
شحال من شَمْتَه
تهرَّست عْلَى ظَهْري
شحال مَنْ وَشَْمَه
تْوَشْمَتْ فَ خْفَا
****
حيِّرني أمري
ماعْرَفْتْ أش تَمَّا
بْكَثرَةْ النِّفاق
و طََلْيَانْ الزَّوَاقْ
العَيْنْ عْمَاتْهَا اللَّوانْ
أرَاسِي أش تْكُونْ...
حجره صمَّه
تيمومه ولا رخام
طير ف السما
سارح لغْنان
شْحَال قَدَّكْ أَقَلْبِي تَعْشَقْ النَّجْمَه
فَ السَّمَا
وَ أَنا فْ بَرْ الغابَه و بْحَرْ بلاَ أَمَان
****
شَعْلْت ضَوْ رَاسي
تْحَرْكْ فِيَّ لَكلام
دَوَّاتني لَحَلْمَه
نَسْرَحْ ف نََفْسي
نَكتب اسْميْتي عَ لَبياض
وَشمَه ضَاوْيَه فَ سْوادْ
يَنْطَقْ صَمْتي
تْبانْ حقيقتي
حرُوفي بَصْماتِي
بِها يَتْحَقَق حَلْمِي
يَكْمَلْ المُرادْ
****
يا حقيقتي لمخبيه
ف ركان حبّة الطين
لّي فيَّ
نحاول نقراني
تعاندني ما تسعفني
حتى فضح سرك الما(ء)
خلاني نقرا نقطاته
كل نقطه ب حرف
كُلْ حَرْفْ
فْ القَلْب وُشَام
عْلَى الجبهَه وْسَامْ
****
قريتني... زادت حيرتي
محال هَذِِ تكون حقيقتي
استغفرت لنفسي
عَاوَدْتْ لقرايه
ما فهم ما فهمتني
شَعلت نار الحيره فيَّ
كلمَتني بلسانها لمشحر
فهامتي تقيله ثْقَلْ صّبر
حقيقتك فيك... فيَّ
فيَّ... و فيك
****
نجمتك واقفه
تشهد عليك
جْمَعْتْ لْمَا(ء)
... النار
...الطين
نْطَقْ صَمْتي
صَمْتَت لْكَلْمَه... فيَّ
واش حقيقتي ف موتي
أوْلّا موتي هي حقيقتي
يمكن حقيقة لحياة
تْفَكْ خْبال حِيرْتي
****
مسحت مَراية الزمان
النظره
ما وضحَاش مَزْيان
بان خيال حقيقتي
مطرز ف كْفَن امْرا
ف وراق طايره
وراء سراب
تقراها الشمس ف صباح
تعيي تمشي ترتاح
تخلي الگمره ونيس
إيلاَ غابُو بزُوج
تَبْقَى الظلمَه
تحْكِي بلسان إبليس
تيهني ف ظلامي
هربت مَنُّه ل نْوَاري
شدَّتْنِي
ذَابْتْ فيها... اسْراري
****
لْقِيتْ حَقِيقْتِي
ساَكْنَه
نجمه خدودها مورده
ف نهار مخاصم ليلُه
ف السحر
ف الكون
زاد تيهي
وتّيه هرب مني
لحوش السؤال
يتلذذ ب حلاوتُه
يفركل ف احضان الكون
يرسم لحقيقتي عيون
تغرف لكلام
تسقي بها لجواب
الحامل ه

م السؤال

حيِّرني أمري
ماعْرَفْتْ أش تَمَّا
بْكَثرَةْ النِّفاق
و طََلْيَانْ الزَّوَاقْ
العَيْنْ عْمَاتْهَا اللَّوانْ
أرَاسِي أش تْكُونْ...
*
زجلية رائعة
تحمل في تناياها من الواقع الكثير
لك مودتي

» اوشام الحرف :صيد المعاني في بحر الكلام للزجالة أمينة الخياطي
» صدور ديوان زجلي اوشام الحروف للاخت الزجالة أمينة الخياطي
» مرسال الروح..زجل للشاعرة المغربية أمينة الخياطي
» رحبوا معي أجمل ترحيب بأختي الفاضلة الزجالة المتألقة الخياطي أمينة فمرحبا بها بيننا
» رغى لحروف

منتديات دواوين الثقافية و الأدبية

منتديات دواوين الثقافية و الأدبية

الوشمه 11 من ديوان أوشام لحروف للزجالة الخياطي أمينة