هي لحبيبة فلسطين
العام اللي جاء
يلقى قلبها احزين
اتنين واتنين
لا بها حاسين
ولا لصوتها سامعين
دارو اعليها اشارات
ووسعوا اعليها غارات
اش منك يا طيارات
بواريج ودبابات
غزة ديما مستهدفة
محرومة
مضيومة
مغمومة
احقوقها مهضومة
لعرب ديما تتفرج
ها اللي يحمي لعواد
ها اللي يقطع الزاد
ها اللي يدير كلمتو في الجباد
وغزة انهارها اسواد
ضاعت فيها لعباد
اترملات النسا
اتشردو لولاد
دم الشهيد ديما هواد
كل يوم استشهاد
القدس دنسوه لنجاس
لا اهنية ولا عباس
انسا واطفال في لحباس
دايرين اعليهم الف عساس
والف حباس وحباس
فلسطين لحبيبة
اغريبتها اغريبة
يقصفوها اوجيبة بعد اوجيبة
ديما يعدوها اغريبة
كل يوم اتصيبها امصيبة
لا عالم ولا حقوق
لا امم غير الشقوق
المسلم من دينو مسروق
والهم فينا مسبوق
الحلم العربي نفاق
وراه الف سفاك وسراق
اكلمات اخفاق
مكتوبة على الاوراق
الحيرة ركبات الخلق
ما ابقى ادنى صدق
لا فتح ولا حماس
كلشي غير اللباس
هنا واهناك اغوات الناس
دقات الاجراس
اكثر الباس
طار النعاس
كلها على راسو عساس
ولعبت العبتها الانجاس
كلشي على الحق اتغاما
وعلى الطريق اتعاما
لا كوفية ولا اعماما
لا خصن زيتون ولا احماما
التستهدف القطاع
ولا اتغيرت الطباع
الصاع هو الصاع
ودام الصراع
واتوسع الاقطاع
غزة في دوامة
الله يرزق السلامة
الله يرزق السلامة

شعر مصطفى امزيل المعازيز في 16/11/2012
اقليم الخميسات المغرب

زجليتك رائعة استادنا مصطفى امزيل مررت فشدتني كلماتك الرنانة دمت للكلمة سلامي الى ناس المعازيز.

بارك الله فيك اختي الفاضلة
لطيفة الجرداني
وجزاك خير الجزاء
تحيات اهل المعزيز واقليم الخميسات
مودتي واحترامي