اش طمعك
اش طمعك في اديال الناس
وانت ديما اعليهم تنصب وتسرق
اش تيدور ليك في داك الراس
اصبحتي ما تحشم ما تعرق
اش طمعك
تبت اوكان وكون مزيان
المكسي بديال الناس ديما عريان
اش شاطليك انت يالهفان
غير عيشت الهم والاحزان
اش طمعك
اش طمعك وكبر بطنك
تاكل وتاكل ولا اخوى حنكك
ديما تجري ورى ضرك
بان واتفضح سرك
اش طمعك
اش طمعك في لعب لغدر
ديما على ابنادم تتجندر
ما كاين غير جيب يافم واهضر
بلحرام على لخوت تتجبر
اش طمعك
دير شي امزية ابحال اقرانك
ديما بلغدر اتغير الوانك
الرجوع لله سوي اوكان اوزانك
وكل عقدة فكها باضفارك واسنانك
اش طمعك
اش طمعك ودخلك في هذا لحريرة
والطمع يا ابن عمي يعمي لبصيرة
ما يخلي العين تبقى اقريرة
غير حالك الحياة راهي اقصيرة
اش طمعك
الناس عاقت والنايمين فاقوا
ما ابقات عند سايق ولا سواقو
جمعت وطوات وكل بين احماقو
المسكين مزقاتو وجرحات اعماقو
اش طمعك
اش طمعك انهار انهار تهبش
باحماقك وبغدرك ديما اتبقش
اخيرتها تقرصك لفعى ولا احنش
تلقاها واقفة كنت ديما اعليها اتفتش
اش طمعك
اقنع على ما اعطاك الله واصبر
بالحق كون حقاني وبه اكبر
الدنيا ما دايمة وانت غير تغير
والايام محسومة وانت بارك اتعطر
اش طمعك
اش طمعك وخلاك غادي وتنتف
اصبحت عرباز غير بارك وتشتف
هايم في ادروب الانزلاق وتخرف
اتعلم مع اولاد الشعب كيف اتصرف
اش طمعك
شعر المصطفى امزيا المعازيز في 8/10/2012
اقليم الخميسات المغرب
الرئيسية
موضوع: ** اش طمعك ** زجل مصطفى امزيل 
الجمعة 19 أكتوبر - 0:48
