الشارب كبير
والعقل الله يجيب
لابس لبسة حرير
والدهب في اليد
الشكي حبيبه
والفشوش صديقه
*****
ما ينطق غير بيده
حينت المسكة في فمه
عيات لسانه
الله يحسن عوانه
سمع النظافة من الايمان
تبع النظافة وترك الايمان
رد عقله سكنا للفيران
وشحال عند الفار من غار
*****
سهران الليالي
ها القهاوي ها العراسي
وتلقا بشي دراري
كملو ليه الباقي
نهار تقادة ورث اباه الغالي
دارو فيه دورت الزمان القاسي
*****
فين الحرير
رجع شراوط مدلين
فين الدهب
رجع جروح في اليدين
فين المسكة
رجعت سوسة في السنين
تهوس الراس
وتحرق في العينين
*****
ياك قلت ليك تهلا في ورث اباك
راه كنز ثمين
وانت ماعرقتي مانشفتي
جاب لك الله خبزة بين اليدين
تبعتي الحاشية
خرجتي حاشية
كليتي ما شبعتي
*****
وكيف دير دابة تعيش
وانت ماتعلمتي حرفة
ماكنتي درويش
عامر عار
مادرتي الخير
في حباب ولا جار
والله يخلينا فقراء
على هاد الحساب

مول الشارب كبير
آحضاو لحباب
كيف يدير الخير
وإلا القلب طاب
ولا تنسى ربي كبير
*******
يا جمال الدنيا مدرسة
آحنا صوتنا
جاب ليهم الله آشراو لكراسة
الدنيا طريق فيها غادي وجاي
شوف أنت ، آسمحتي في عنداك تنساي
طريقنا كانت تدي وتجيب
جعلتيها غير تدي ياك ما درت فيك العيب
الله يسامح لك......