فين هو لوفا

الله يلعنها حرفا
كلشي ضربوا ليه تلفا
غير اللي جاء يغمس بلوفا
ويضرب اضربتو في اخفا

فين هو لوفا

حتى من التعليم خرقوه
جعلوا فيه اثغور وزوقوه
شي غربوه وشي شرقوه
ها اللي انفاوه ها اللي مزقوه

فين هو لوفا

طاشرون التعليم ادخل امجهد
فين ما داز ما تقول غير امهند
ديما مرفوع ما عاقل امعربد
استعماري ديما يقصي ويجدد

فين هو لوفا

فين هو لوفا ولا باقي بارك
استعمار اجديد يا ولد امبارك
نحس اجديد داخل لمحارك
انت لا حاس ولا واعي ولا دارك

فين هو لوفا

اه انت من اصحاب امدارس لفلوس
ياك ما ادبيحة بشي عتروس
ولا من اصحاب التغييرات للدروس
ولا املوث عقلك بشي فيروس

فين هو لوفا

على ما اضهر وبان ايامك اقليلة
وعمر حقيبتك بين يوم وليلة
اتسنى ساعتك ما هي اطويلة
الايام اتبين ليك كل ابديلة

فين هو لوفا

من ساعتك شادها من اقفاها
باغي تقلب اسفاها على اعلاها
تصحاب انت من ادرسها ودراها
ولا باغي اتقول انت مولاها

فين هو لوفا

شوف ليك شي حرفا اخرى
باركة ما اتزواق في الهضرا
دير ليك شي احجاب باش تقرا
ولا كل ليك حبة لفهم باش تبرا

فين هو لوفا

داخل مع راسك اسخون امعنت
دابة تطوال المدة ومن لحساب ما تفلت
اشحال منك دازو واحلف واحنت
انت داخل فيها اتجلط واتفتت

فين هو لوفا

دير عقلك في راسك وخمم يا لبهل
باين والله اعلم انت دروة في الجهل
كون الخوخ يداوي كون داوة ابحالك اقبل
الفاهم يفهم ولعصى ياكلها الطبل


شعر المصطفى امزيل في 7/10/2012
المغرب

السلام عـليكم أستاذي المقـتـدر مصطفى
بـدون مجاملة و أنا مـن عـادتي لآ تروقـني المجاملة ..زجليتك رائعة ،وهاد الكلام اللي كيجيني عـلى كانتي...
وهادا هـو نوع الكلام اللـي كنـكـتـب....يـا سلام...
فـين هـو محـمد الوفا ......اللي كرَهـنا فهـاد الحـرفة
يقـرا فـيــن هـو لوفــا.......يجـدب و تجــيــه السخـفة

أحـمـد تـكـيـطو

وعليكم السلام
سيدي الفاضل الاستاد احمد تكيطو
الله يحفظك استاد
ويطول في عمرك
هذه تنعتبرها شهادة منك
وكاين ان شاء الله بقية
مودتي واحترامي

انت لا حاس ولا واعي ولا دارك

*********
علاه هو حاس ولاعارف ولاداري ولاكاري ولاشاري ابتلنا الله بمثل هؤلاء حسبي الله ونعم الوكيل

الاخ الكريم مصطفى امزيل مشكور

الله يعطيك الصحة
دورة شرفية على معضم الحالات
التي نعيشها
والتي تقلق مجتمعنا
رائع خويا