شَفتْ وجْهي

حَطيتْ وجْهي قَدَامْ وَجْهي

طَلْ عْلِيا طَلْ مَنْ لَمْريَا

فين زين وفين سنين وفينْ

قالي مَخَبِّيتْ عليكْ احْكاية

اشْبَابْ ولَبْها يَرْجَعْ لَطينْ

ولْحَمْلة تْجرْ تْخلفْ الضَّاية

شَفْتُ مَهْمومْ بَانْ للي احْزينْ

تْفكرت يا ما ثعبي وشْقيا

سولتْ خْيالي شمال ويمين

فاقْ جَرْحي فَيْقاتو لَيامريا

رجعتْ الماضي بين وبين

مدى خَصنيْ مَنْ قلم ودْويا

نَحرّكْ اليومْ ولا مَنْ لَّخْزينْ

نكتب وانحنَّشْ عل حظي وَهوايا

تفكرت اسهرانْ ونجومْ عاسينْ

عينْ ف عينْ وغْيمات سمايا

وليلْ يَامَا شْهَدْ علَ وَحْدة واتْنين

شهد عل تَنْها دي من فايا

ف بالي صورتْ ظلم والظالْمينْ

كيفْ البارحْ و ما شَفْنا اليَومْ كْفيا

ترعش ذاتي وجوارحي عاطْلينْ

ف شي بعضين قَالْبينْ الاية

الحَكُْرة وبْ رْزَقْ الناسْ طايرين

العيبْ يْقولْ لَمْكَرْ تَكْحازْ حْديا

ازْمانْ ما يرَحْمَكْ يَا مَسْكينْ

ولَعْبادْ والدنيا هَكْذا مَشَّيا

علَ منْ تْسنَّدْ واشْ مَنْ صْدرْ حنينْ

تْقالْ راسي ملاّتْ لوذَنْ ما تَسمَع غاية

لاقول لاصْدق رْفَقا ضاعتْ ف طينْ

النية ف حديتنا بَعْناها وخَنَّا لُوصيا

لمحبّة جَفْلاتْ أوين تروح وينْ

جْلاَتْني بِينْ دْروبْها تَسْقيني سَقايا

سَكْناتني ب كْذوبها وطَمَّعْتْني باليقين

تْغني للي ب أوْتَارها إحَنْ ارْجايا

أجا ما يَمسَحْ دمْعاتْ العينْ

وأنت فَيَّقتِ دَمْعاتي يَامْريا

البعليوي عبد السلام