فاس المدينة ويامها الزينة
ـ 6 ـ
الحنة

شفنا المرة الماضية
الخطبة دلالا شمس الضحى
بنت لالا رقية
وسيدي عبد الغني
ولد خالتي هنية
كانت عشية دايزها لكلام
فرحو بيها لحباب
ودارو فيها الصواب
وتّافقو من بعد تلت شهور
يديرو الحنة والعرس لي يبهر لحضور
ايوا آراك للتوجاد

القفطان لخضر
المطروز بطرز النطع
لي يخلي العروسة يوم الحنة كتلمع
والحنة تكون من سوق الحنة ولا بد
تّدق وتغربل عل اليد
باش تطلق الخيط ملّي تّهزّ بالمرود
تطلقها الحناية بيدها
دّيرها فزلافة ديال لودع
وتحط بيضة وسطها

والحنة عندها صينية
كتوجّد بالقاعدة حتى هيا
فيها القالب ديال السكر
والمرشّة لمعمرة ب ما زهر
والحليب والتمر
و زليفة د العود وسرغينة
باش تبخر الحنينة

كتجي النكَّافة وتلبّس العروسة
بعدما كتوجّد ليها الكَلسة
وتفرّش ليزار لخضر
المطروز بالصقلي لصفر
وتستف لخدادي المطروزين
عل الشمال واليمين
تنزّل عليهم العروسة يديها
ملّي تكون الحناية كتحنّي ليها

لعيالات راهم حطّارات
وبالاخص البنات
كل وحدة عل النبي صلّات
وزغرتات مع الزغراتات
منهم الطبالات
والغنايات

العروسة حنّات
ودابا جات نوبة البنات
كل وحدة منهم
غادي تحنّي صبيّع من الصبيعات
باش يعرفوها الناس
مازالة ما تزوّجات

هاد العشية
ماخلّات ما وجّدات ليها لالا رقية
حيت ما عندها غير داك البنيّة
لالا شمس الضحى زينة السميّة
وجّدات المحنّشة وكعب غزال
والفقّاص المتوّل تتوال
وغريبات عل لنواع ولشكال
اتاي وانواع العصير
وحتى لسان الطير

اما حباب لعريس
جابو اللوز والكَركَاع المعمّر ف التمر
والحليب المنسّم ب ما زهر
وجابو الحنّة ف التّكيمسات
باش اتّوزّع عل لبنات
زيادة عل الحليوات
ف الطبيقات
والحوايج لّي شفنا ف الدفوع
مفرّشين ف الميدات
هادشي جابوه بالدقة العيساوية
باش تزهى العشية

ايوا آش نقول ليكم؟
كانت حفلة دايزها لكلام
وغادي تّبعها شي عرّاسية
لّي تليق ب المقام
ونبينا عليه السلام

يتبع...

ـ فائز سعاد ـ

05 يونيو 2012

اختى الغالية سعاد فايز .لازلت تحتفظين بعادات و تقاليد
مدينة فاس .المدينة العلمية .التى تخرج منها رجالات
كبار فى السياسة و الثقافى و علم الفلك وووووووو
يا ليث كل مثقفة عندنا فى المنتدى .ان تبين لنا
و لو جزا بسيط من عادات و تقاليد مدينتها
دام لك العطاء

محمد منار

اختي الفاضلة سعاد فايز
الصورة جميلة في قالب جد رائع ومتميز
يترك القارئ يعيد قرائتها مرات ومرات
تركني النص اعيش بكل وجداني داخل
هذا العرس المغربي الفاسي
بين العروس والبنات والنكافة
وتلك الطقوس الجميلة التي افتقدناها الا نادرا
اشكرك اختي الفاضلة على اصالتك المغربية
لان اصالتنا هي هويتنا
لك كل التقدير والاحترام ومزيدا من العطاء المتميز
مع اجمل تحياتي

شكرا لك أختي سعاد الزجالة المتمكنة
كلام جميل عن تقاليد أجمل وأعرق تمثل عادات مشتركة بين جهات كثيرة من المغرب لطالما افتقدناها خاصة في أوساط المدينة الحديثة ,
زجليتك جعلتني أعيش مقامها بكل التفاصيل .تمكنت من أخذنا بين صفوف البنات والحنايات والنكافة والعروسةوتكميسات الحنة وزيد وزيد...فعلا وثيقة تستحق مكانا داخل المتاحف المغربية والمكتبات شاهدا على عمق ثقافتنا وتقدم تقاليدنا ونظافتها فكريا واجتماعيا ,دمت مبدعة كما عهدناك وعلى كل من تريد إقامت حفلة الحناء والعرس أن تستند إلى زجليتك بكل تفصيل.
حفيظة تحييك مادة يدي إلى الحناء بحناء فاس هههههههه

الاخت الجليلة
سعاد فايز
هذا هو الهدف والغاية من كل انواع الكتابات
توثيق العادات والتقاليد
لتسترسل من جيل الى جيل
كتبت فصدقت وابدعت
استمتعت بهاته الخطبة
وعقبى العراسية
تحياتي وتقديري
اختك فتيحة رشاد

الف شكر لك اختي الفاضلة المبدعة سعاد فايز على هذا العمل الزجلي والجهد الجميل لتعريف بمدينة فاس وتقاليدها لك كل التقدير والاحترام