صرخة

علاش انتوما هكذا علاش؟
علاش المواطن عندكم مايسواش
يا الزايدين المهموم في همو
يا لمعاونين الظالم على ظلمو
حادڭين فالشفرة والترياش
الحق كبلتوه وسادين فمو
والمعقول قهرتوه مسيلين دمو
الڭلب لحنين فيكم ما بقاش
بكايا جاكم منغوم
لا من داها فحالي
شكايا جاكم شدا
شدا الطير الغالي
همي أجيال البارح
وشكايا أجيال اليوم
وآش وجدنا لحفيذ غدا
التعليم مدني مهزوم
ومستقبل فارغ خالي
يلاقي فالڭلب غُدا
وزر تقيل جارح
بالبطالة شارد مهموم
جيعان لاصق جلدة
تسربو من عيني دمعات
حارّة علْ الخد وكواتو
مريرة توشمت تطراسات
لبكا عيوني ولفاتو
فين لوعود شحال دلحوكومات
هلو بالتغيير وفاتو
كمدونا وزوقونا بالشيعارات
كل حزب بلواناتو
يضحكو علينا بالنقابات
كلها وسياستو
ڭال ليك التصريح بالممتلكات
يورينا بعدا منين جاتو
وفلوسنا حنا فين مشات
المواطن الضريبة هلكاتو
هما عايشين عز الحياةْ
ولكثير منا معزي فحياتو
ولادنا يعيطو غياث آ غياث
وولادهم للمناصيب توارتو
سياستهم أسرق وغش مليح
عمر و دك السلة
وإلى جا وقت التصريح
ڭول عا لقبر وما خلا
أو هرب ما حدك صحيح
أنكر الصاحب والشلة
عنداك تعتر وتطيح
زلتك ما بحالها زلة
راه شاهد عليكم التاريخ
ودوام الحال من الموحال
كثرتو وتفرختو تفريخ
راه حنا رادين البال
وخا حاضينا لمقدم والشيخ
ومحرشين علينا صحاب الحال
الّلي نطق يلقا توبيخ
أو تهمة تخليه غير خيال
ومطامر لعذاب والسليخ
ما تخلينا نفقدو آمال
واش لبحر يوكح
وڭاع الويدان تكب فيه
حاشا المغرب يجوع
وسيدي ربي حاضيه
ولابد الحق يبان بهالة
مضوية في كل مكان
لابد تتغير الحالة
قصار أو طال الزَّمان