محمد بـازي
صاحْبْتِي لْبْحَرْ ودَّاك


سْبحانْ اللَّــي خَلْقَكْ وعـَـــلاَّكْ
ياهــْـلالْ ما تْرَهْبو نجــوم صُبحيَّةْ
لاحْ ضيَّكْ ناصَعْ فليــلة ْ بـــلاكْ
شعَّـــالْ يهـزمْ غيماتْ شَتْويَّـــه
ينالْ ضوَّكْ سْفــاينْ في بَحْر حْمــاكْ
ولْعْماق فلْبْحور علـــى بَعْضَها مْطْويَّه
مَنْ قلبك علَّى دُخَّـانْ نارو شاعْله حْداكْ
فحرّْها حبـال علـى عنقك مْلويــهْ
***
اللِّيلْ..هُما الناس وأنت تصيح طالْب لْفكاكْ
يتْملمـــلوا حيَّات من دْمياك مرويـهْ
شْحال من واحد حـاولْ يسبح فمــاكْ
رْماتو مَّاجـك فْصحـــراء منسِيـهْ
گَالوا يْنَسِّوْك بالكيسان ودخاخن لهـلاكْ
وبيبــانْ مْرخْصـة للدعارة المخزِِيَّــا
غَرْقو لْبْــــلاد فْبْلا ما مْنُّو فْكـاكْ
نَبْتو على قْبَرْها نْواوُرْ وهِـــيَّ حَيَّـهْ
و تْربط مْصيرنا بْكلْمة يْقولْها هذا ولاَّ هذاكْ
غَوَّتْ يا ذيب ‎السِّينْ يْجاْوبَكْ ذيب مْلْوِيـَّه
***
عْيونَّا عَلْحريرْ وقْلوبْنا علْشْـــــواك
والْكـرامة يابابا فرْشوها حصيرة وْ زُربِيَّـهْ
فْكُلْ واحد ْ منَّا ســــــاكن دراكْ
يقَرِّيهْ مواويل الصمـتْ صْبـاحْ وعشِيَّـهْ
فسوق اللْـــــغى باع لْكلامْ وشْراكْ
عرّاك من الكُمِّيَّة ولَبْسَكْ قُفطــان صْفِيَّهْ
وضْحات الرُّجولة شبـــــح يَرْعاكْ
يْرقصْ ليكْ فْلْغيامْ ويْسليِّكْ حْكاية وحْجيَّـهْ
***
ليهُمْ اللَّـه ليهمْ رْجاي ورْجـــاكْ
ليهمْ العافية والبارود والرجـال المحضيَّـهْ
كيسان دمَّـكْ من هذا لذاكْ ومن ذاكْ لْذاكْ
على كْفوفْ لْعْــدا صارتْ ناطْقَه بالْعْزيّهْ
***
لْكْــلامْ بْلا لْجامْ عــــــَوْدْ درْداكْ
عثْراتو صَــهْلاتْ فْسْمـاواتْ علْويّـــهْ
يْزَوَّرْ الحقّْ بْمْخالبْ ذيـــبْ فتـــَّاكْ
ويْكتبْ مَنْ دْوايا قْلومْهـــا خلْويّـــَهْ
يا وِيلـــي... صاحْـــبتي لبْحرْ ودَّاكْ
وثْقْتِ فْصخْراتو وكانـــت رَمْليَّـــهْ
شَطْنكْ وفْلْحُلــــــمْ لْهــــاكْ
وغَزّاكْ جْــزاير بسْفـون ورقيَّــــه
حتّى الشيـــب رَكْـــبَكْ وغْـزاكْ
ودنَّاكْ لْقْبـر فكـــفان معريَّــــهْ
ويا مـا حاولت ْ تْوطَّـــنْ خْطــاكْ
وياما جرَّبت تْعــوم فْمِـياه نْقِيَّــــهْ
ياما فَكْرَكْ ضَحـْـــكَك فبْكـــاكْ
ويا ما نَسَّــاكْ صْباحــك فْذَبْحات ليليهْ
اللـه يجْعلْها كـحلة لْلِّي خلاَّني وخـلاَّكْ
نْتْرجاوْ الـدّْفا فنــارْ مْطفيَّـــــه
وما باقي همْني عْـراكْ مْلِّي عْـرفْت كْساكْ
وملِّي صـورتك ضاحْكة فْموجات مَعْليَّـهْ
ذَرْعانَك فيها مْحزْمة بْخـيوط ْلهْــلاكْ
ودمّك فْـمــاها دمْعــات عْصيَّــهْ
وطيوركْ بحــرية بالْغنا مْوَشْحةْ سْمـاكْ
وقصْتكْ بْعَلْــم الْعــالي عنْدها مْـرويةْ
هذي كلماتْ جاتْني ياسيدي فْصورة مـلاكْ
يْمكن لْيــام تْكتبْها بْحــروف ذْهب

شكرا للاستاذ الغالي سعد محمودي
وشكرا للاستاذ
محمد بازي
على هذه الزجلية
تحياتي وتقديري
اختك فتيحة رشاد

شكرا لك أختي الفاضلة فتيحة رشاد وكل الشكر للمبدع القصيدة الزجال محمد بازي

شكرا أختي الفاضلة المبدعة سعاد فايز على مرورك الكريم وشكرا للزجال محمد بازي