عام أواشْ
ونا غرّوحن
بين ما تحن وداب تحن
كدّوح المگروح
فيه زين لولاد
ولداتو لي ليّام
وسمّى راسو لغرام
ما دّاه رگاد
لاش يرگد؟
ولاش؟
وتّ لاش؟
عام أواش
ونا غنتوجّع
تا وجع ما خلاّ حقّي منّي
كيتي أنا يا وعدي
أش من حق باقي عدّي؟
تا زحيم الوالدة شدني
دار لي نميرو سطّاش
وخرّج في لّي ما يخرج
هلّي يحنقز
و هلّي يفرفر
و هلّي يدرج
وعدت غنسرسر
سر ورا سر
وهي تا سر فيها ما گر
يا مگواني من حر عدابي
گع لقوار عرفوني
گع لبيار حقّوني
وحالتي علدرگ ما درّگ
نضل ونبات لاّلي
حالي يا حالي
ما عرفتك عمّي
ما عرفتك خالي
همّي ولاّ دمّي
جابني ودّاني
دّاني وما جابني
لاش يجيبني؟
ولاش؟
وتّ لاش؟
زيد هلكني زيد حيطمني
را ما عد بويا گلب يحشم
ولا ما برّد الشّوف كانون الجّوف
درسني ودرّيني
على بردي لمفضّي
تيصفّي لمحبّة
حبّة حبّة
من تبن والكرفة
وما تصيب في ما تلم
لاش تلمني؟
ولاش؟
وتّ لاش؟
***
ونهار جات عيني فعينها
عيّطت جبد
نجبد عروگ السّدرة
هي تجبد ونا نجبد
أنا نجبد وهي تجبد
علّ وعسى نگد نشبّها
غوّت على ما طاب مقراجي
نگرگفو كلعيساوي
فاجيها خلاص يا مول الفج الفاجي
لاش يفاجيها؟
ولاش؟
وتّ لاش؟
تجمع فسهب خدودها
نوّار ونوّار
جا من كل دوّار
يبايع لمولاي السّلطان
مول السّلهامة الحمرا
سيدي وسيدي بلّعمان
وناري أهيا ناري
غما طلا بلادي قوق حمار
شدّيتها جرية وحدة
ما صدّيت لتصدّة
تا شدّتني الجّرية
گالت لي شوّر علي يا هد الگمري
گلت لها خلّيني نجري
الله يعطيني تفرگيع
خلّيني نديع
فعراصي راسي
ها سيدي ومولاي ربيع
سرّا گبل ما الگافلة تسرّي
بلهلا يگزيها له
وخّ تفگعو لمنازل
وغزلو شلّ مغازل
ما فرّزت منها غا عيب وعار
وا مولاي لعقل
أنا مزاوگ فيك
غسير گيّل
ما بقى عدّي ما نگجدر بك
***
ونهار جا فمّي في فمها
واه واه محلاه
غيشوفو لعسل الحر
يتّحنى ويتسوخر وراه
جات من كل قبيلة صربة
وفكل حطّة حطّت حطّة
هاو تّ رها الفيجطا
بلا خبار المُخ زنْ زنْ
أرا لك من بارود وحبّة
وعودي فكل محرك يحنْحنْ
يهز البوط على ظهر لعيوط
بلا ما تسوط علّجمر يزهر
خلّيني نطيب بلمهل
لاش نزرب؟
ولاش؟
وتّ لاش؟
ولغبابر بروك
عادت گلتة فيها نتحمحم
شيلاه أمولى هدوك
زغاريت علاّ ما ولّى
لاش يولّي؟
ولاش؟
وتّ لاش؟
هد بضاض شحال عضّاض
عدّو شي سنان سبحان الخالق
ما لها فك ولا حنك
سال عليها كل عاشق
منين ما عجبك بدا من الكسدة
ما تخلي ودگول شهدة
لاش تخليها؟
ولاش؟
وتّ لاش؟
وواو
العديان گع تخواو
ولمخالفين گع تسواو
من داكشي رفيع هد الجنّة
لهلا يحرم حبيب منها
هنا گبل لهيه
الجّايّات ما هما كلغاديات
ما كان فبالي والله القسم
تا لفّام حكماهم سلطانة
تحكم مرّة فلعمر
وتزيد خلفة تعطي بظهر
ها العار يا مولات لحكام
حكم علي باش ما تبغي
لمحنّة محنة
مشكماني نزيد أندّنّا
بنّتها ما كيفها بنّة
قتليني وحييني شلّ وشلّ
عدّك حق ومدا حقوق
زنافو ما عدّك في سوق
أوگالّك غرام الكام
ناري شحال درگلها
واش سمعتو ما گال هد المانك؟
على داك لحرام؟
وتّ سير ولاّ نفتخو لك علگنّة
ونكميه وما نخرّج دخّانك
واسير الله يعاونا ولهلا يعاونك