مسرحية الكابورال علال مقتبسة عن فكرة نص "مغامرة رأس المملوك جابر" لسعد الله ونوس

الأحداث:
في غمرة الحصار، تخطر على بال الكابورال علال فكرة كتابة رسالة تحت فروة رأسه لإيصالها إلى قائد كتيبة أجنبية في الجانب الآخر؛ من أجل طلب الدعم، وكسر الطوق المضروب على فيلقه من طرف العدو، مقابل نيل غرض نقله قريبا من حبيبته مريشة. لكن يحدث له ما لم يكن في الحسبان.

المشهد الأول
(يظهر علال في حالة حراسة ليلا. يلقي نظرة إلى صورة في يده/رجع)
- الكابورال علال: يهديك الله علي أمريشة..
- مريشة: علال.. ما تبقاش تگولي مريشة.. شحال من مرة گلت لك را سميتي مريم؟
- والله إلى سميت مريشة لزوينة وجات معك أحسن.. مريشة البوحشيشة.. أنت هي بوحشيشتي..
- گلت لك ما تبقاش تعيط لي بها.. ما تبقاش تعيط لي بها صافي.. ما تتعجبنيش أنا.. ولا غادي نتقلق ونخطيك بخطرة..
- وتقدري ألعفيريتة ديريها؟
- والله تنديرها لك گد فمك وما حشمتي
- ونا بعدا گع ما نقدر نديرها..
- علاه انت فين عمرك قدرتي دير شي حاجة..
- أش بغيتي تعني؟
- تالين أنا غادي نبقى معلگة هكا؟ منا من لمجوجات.. منا من البايرات
- وراني گلتها تاني للكومندار و... و...
- جي بعدا غهدر في..
- راه خفت غنجي ندير إيدي فإيد بوك يسرف علي من نهاري.. ما يطلقني تيطلقني والد معك واحد ولا خمسة.. ونا باقي مجلي لهيه..
- إوا والمعمول؟
- غير زيدي صبري شوي تاني.. را قريب يفرجها مولانا..
- سمع أولد الناس لكلام المعقول لي غادي نگولك.. غادي نصبر عليك من هنا لبرمسيون الجاي.. جيتي تخطبني تبارك الله.. ما جيتيش انت من طريگ ونا من طريگ (تخرج)
- مريشة.. مريشة.. مريم.. مريم.. هاكي بعدا.. شوفي أش جبت لك (تعود لتأخذ هديته ثم تخرج. نهاية الرجع. ينتبه لدخول الشرجان عسو) مون شرجان
- الشرجان عسو: مون كابورال (يضحكان)
- الجو جاعر شوي هد الليلة.. غير بنهار الشليمو تيصوط.. وبالليل لقرم لي تيكرم تا لكرم الله يحفظ..
- وهدا هو جو الصحرا ديما كان هكا من نهار خلقها سيدي ربي.. كيف دايرة بعدا الأمور هنا؟
- ما كاين لا غاشي ولا ماشي.. تلت شهور هدي ولعدو تيوتجع علينا وباقي ما بغى گع يولد خلاص.. ويهجم علينا كيف ما گال شحال من مرة..
- هداكشي غير مناورات والحرب النفسية
- عنداك غير يكون هدشي ما منو والي.. غير لكدوب والفوحان الخاوي..
- في العسكر كلشي معقول وحقيقي.. حتى لكدوب
- عندك شي مرتال أسي عسو؟
- علاه صافي فضيتي مع لبّار ديالك؟
- وت أنا راه خصني نكمي صاكة كل ليلة عدا لرصا علي هد لمجاج لي غير تيغلي
- ياك أودي لباس أسي علال؟ مالك أش طرا لك؟
- ماطي لي لبريكة
- لبريكة تا هي؟
- أش غادي نگولك أودي أسي عسو.. لهلا يطيح حبك على شي صفية ويصفيها لك..
- كفاش.. مالك؟
- ما عبرتي غير انت.. مشيتي لگتيها والدة گع وتهنيتي بخطرة.. ها هي لي باغية تخرج لي عقلي.. والكومندار سي بنحادة معاونها علي.. عامين هدي ونا تنزاوگ له في لبزيزيلة ديال مو لعزيزة عليه باش يقربني وخ غا شوي لعندها.. ما نفوتش 100 كلم ولا غا 50 كلم بارك علي بيني وبينها.. وهو تيدفع لي غير يدير الله خير.. يدير الله خير.. وهد الخير يمكن ما يبان هو تنتقضى أنا (يمد له الصورة)
- تبارك الله.. هي عندك النيشان مزيان غير فهدشي.. ديك المرة أغيول كامل گدامك وما جبتيهاش فيه..
- واش تنعاود لك من صباح أسي عسو.. واش أنا لخاطري؟
- تبارك الله.. سمعت بحال إلى شي تخرشيش هنا (يذهب علال للاستطلاع) تبارك الله.. تبارك الله..
- وانت طلق أش من تبارك الله؟ ورا انت لي فراسك تخرشيش.. لقوالب الخاوية هي فاش ماضيين حنا صافي.. عنداك تسحاب راسك گرايدي علي دير داكشي لي گالك راسك.. را كلشي يصبر فيه بنادم.. حتى لوليدات لا.. أوهو..
- راك تتقلب على شي بنيسيو وصافي في الكاشو..
- لواه الكاشة.. ما كفاتكش هد البنيسيو فاش أنا.. عمري كلو دوزتو فهد لخلا.. غير الشيح والريح.. والفرخ إلى داز من سما تيطيح..
- وصبر أش غادي دير.. را هدا هو المليتار..
- المليتار غير علي أنا.. شحال من واحد جا لهد الجيحة الكحلة غا من وراي وعفا عليه الله منها.. ونا معرت مالي يمكن لفي شي دعوة وقيلا..
- ولكن أنت على حساب ما گلتي ليا كنتي مرضي مع والديك.. تا وصلتيهم لقبر الله يرحمهم..
- شفتي رضا كداير؟ حتى برمسيون بطليب ورغيب وشحال وشحال عاد تنشدو.. وتنضرب نصو غا في طريگ.. خليني ساكت أحسن أسي عسو..
- شد.. شد هد الگارو خرج به العافية لي في جوفك..
- را حتى أنا بنادم.. عندي إحساس بحال جميع الناس.. بغيت حتى أنا ندير وليدات ويكبرو معيا..
- شكون لي شادك داب؟
- واش لي مليوح في هد لقرينة الكحلة بحالي غادي يفكر يدير لولاد؟
- ومالي أنا؟
- وانت صافي وا قداميتي ووليتي لصيان.. ولا بد خصني نفكر هد المرة فشي حل مزيان..
- عنداك تكون باغي ديرها وتزرطي؟
- كفاش نزرطي؟ علاه گالو لك علي بلي جابوني للمليتار نهار اللول جريني بسناسل؟ راني دخلت له بخاطر خاطري.. وصدّقت عمري على بلادي..
- إوا؟
- إوايوا.. كون يعطيوني غير عام ولا جوج ولا ستة گع.. غير نگطع الوحش ونرجع نبقى هنا ديما خالدين أبدا..
- ها شي وحش بان ليا جاي لهنا..
- ياكما الكومندار سي بنحادة هدا؟
- فين هو الكومندار؟ راه من گبيلة مشى ما زال ما رجع
- علاه فين مشى؟
- گالك أسيدي مشى بغى يدير شي طلة على لعدو.. ولكن هد المرة مشى بلا شيفور غا وحدو.. سايگ دجيب بيدو..
- وعلاه بغيتيه يسوگها برجليه؟
- ما عمرو دارها أوكان.. أرا لي لبريكة خليني نمشي نكمل تورني ديالي..
- خليها ليا ودبر انت على شي وحدة خرى.. ورا ليا داكشي لي باقي في الباكية..
- باز والله إلى باز.. الله يعطيني وجهك (يخرج)
- وراك عزيز علي بزاف أودي أمون شرجان.. أكتر من خويا لي من مي وبويا (يلقي نظرة على الصورة. يخرج من الجهة المقابلة)


المشهد الثاني
(يرسل الكومندار بنحادة إشارات ضوئية نحو الخارج. بعد لحظة، يدخل قائد العدو)
- الكومندار بنحادة: Mon Général
- قائد العدو: Voilà Mr بنحادة.. هاني جيت بنفسيcomme vous avez exigé .. mais ما عنديش الله يخليك assez de temps سربي قلي أش باغي تقول..
- Avec tous mes respects mon Général ما ديرهاش مني قلت صواب.. ولكن je pense كون كنتي في بلاصتي هدشي لي كنتي غادي دير حتى انت.. لأن القضية pas n’importe quoi
- Alors فكرتي في الاقتراح لي اقترحنا عليك؟
- Oui mon Général.. mais هداك العرض لي عطيتوني ما قنعنيش
- Nooon ne sois pas حتى انت trop gourmand
- Avec tous mes respects mon Général.. عنداك تصحابوني un con طايح على راسي.. راه گع تحراميات ديال المليتار قريتها.. وخوخت سناني فيها..
- علاه گع هداك l’offre لي قلنا لك تبارك الله ne vous a pas satisfait?
- Mon Général.. راني عارف مزيان بليà travers la position فاش أنا وla compagnie نتاعي غادي تنتصرو فهد la guerre بسهولة كبيرة وبأقل الخسائر..
- Vous êtes un vrai loup
- Ah oui.. il le faut
- Alors أش باغي de plus?
- نترقى لجنيرال.. ونكون أنا هو Vice-Président نتاعك
- J’ai jamais pensé بلي غادي تكون عندك كرش كبيرة بزاف قد هكا.. ok ما كاين حتى مشكل.. alors أشنو هي la stratégie نتاعك؟
- Bon sois tranquille mon Général.. غادي نعطيdes munitions blanches .. ماشي لكلشي.. ولكن لأغلب les soldats.. باش ناخد الاحتياط نتاعي.. وما تبانش المسألة truquée لأني صراحة ما عنديش confiance aucune في الظروف.. وحتى في n’importe qui
- Trés bien alors فوقاش غادي يكون الهجوم؟
- Encore un peu de patience mon Général.. حتى يتهلكو مزيان إماهم بالجوع ولعطش.. ووليو كيمشيو غير على كروشهم comme des lézards
- C’est bon pour la fin du mois?
- Ok
- يلا moi je vais filer maintenant قبل ما يشوفنا شي واحد..
- سمح لي mon Général نسولك.. واش كلكم كتعلقو vos médailles هكا على ظهوركم..
- Non pas du tout.. كل واحد تيعلقهم là où il veut.. خص غير يكون عندو ما يعلق..
- وعلاش انت معلقهم هنا؟
- Pour ne pas les voir ونزيد نطمع فيما كتر منهم.. allez au revoir (يخرج)
- A bientôt mon Général.. un vrai salop (يخرج)


المشهد الثالث
- الشرجان عسو: (يظهر خلف علال) شفتو ولا هو لي دافعك!
- الكابورال علال: علاش كتهدر أسي عسو؟ آه كتعني لخماسية
- الرشاش سميتيه خماسية؟
- ضحك غير انت لي جات معك، أما أنا وا هجرتو شحال هدا.. هدا رشاش هدا؟ أش بغى يرش؟ داب نگولها گداش.. غير تقل بلا فايدة.. گع طيح لي كتافي.. واش سلاح لي ما يحيد على مولاه الدل يتسمى سلاح؟
- ما كاين باس نزيدو نصبرو شوي
- نزيدو نصبرو شوي؟ هي باغينا وقيلا حتى يردمو علينا تراب عاد يهنا لك الخاطر.. واش ما شفتيش الكوبانية كلها ولات بحال شي زرمومية طايح عليها الضيم.. يلاه تتململ على كرشها؟ سمانة هدي باش ما ضگنا لا نعمة ولا ما.. ولا زاد هدشي طول كتر من هدشي الله يحضر السلامة وستر مولانا غادي يولي الطايح كتر من النايض
- إوا هنا فين تيبان العسكري ديال بصح من العسكري ديال ميكة
- العسكري ديال ميكة؟ حتى الكاميو ديال الربيتايمو معرت علاش تعطل هد المرة؟
- علاه ما فخباركش بلي لعدو تعرض له وشدو وخلانا بلاش
- وحنا أش مازال تنديرو هنا.. نتسناو تيجيو يشدونا تحنا على خاطرنا وخاطرهم؟ أرا أسي عسو أرا شي مرتال بعدا
- مرتال؟ صبنا حتى الما نشربوه ما بقى غا الگارو
- راسي غادي يتفرگع علي.. وحتى البوعريط حاشاك ديال جمال ما خلاوه
- أنا وخ هكاك هدشي لي طاري ما داخل لي لا من هنا ولا من هنا.. القضية فيها إزّة
- بغيتي تگول فيها إنّ
- انت بحال حنّة باقي عاقل على إنّ
- كفاش زعما؟
- غير صبر علي حتى نتأكد من شي مسايل وغادي نگولك
- لا أنا صبري صافي تقاضى بهد القجة لي قجينا هدو ولاد لحرام شحال من يوم هدا.. وخ نعرف نفدي روحي على گريني.. ونوري لمريشتي بلي أنا ما خليتش من جهدي تا حاجة باش نقرب حداها.. ونعيش معها
- أش غادي دير زعما؟
- (يلاحظ اقتراب الكومندار بن حادة) أنا داب غادي نوري لك أسي عسو علاش گد الكابورال علال
- يلاه أسيدي طلقنا لفراجة
- تيتسويت هي لي ما تعاودش (يظهر الكومندار بن حادة) مون كومندار
- الشرجان عسو: Mon Commandant
- الكومندار بنحادة: ما زال انت ما باغيش تقد ta gueule راهي كومندَوْ دَوْ pas كومندار.. أش دار؟
- الكابورال علال: اسمح لي.. صافي غير كون هاني داب نتعلم لها.. كمندضَوْ ضَوْ ضَوْ.. ولكن مع هد الجوع ولعطش محال نتعلم لها بالزربة.. ضَوْ ضَوْ
- الكومندار بنحادة: الضو! سير الله يشدك حتى يشوطك.. باش نتهنى منك une fois pour toute.. Sergent Assou
- الشرجان عسو:A vos ordres mon Commandant
- الكومندار بنحادة: Fais un saut tout de suite au dépôt des munitions.. شوف لي شحال ما زال عندنا من عتاد.. نبغي تقرير مفصل يكون عندي d’ici une heure pas plus
- الشرجان عسو:A vos ordres mon Commandant (يخرج)
- الكابورال علال: مون كومنـ... مون كومنـ...
- الكومندار بنحادة: Ouiii أش كاين؟ غير قول أش عندك بلا ما تكملها
- بغيت نگولك شي حاجة مون كومنـ...
- إلى كان داكشي لي كتقولي دائماça suffit.. ne me casse plus la tête را ماشي وقتو هدا
- لا لا ماشي داكشي أمون كومنـ...
- Alors quoi?
- عندي واحد الحل
- الحل! De quoi?
- علاش ما نطلبوش الدعم من هديك الكوبانية الأجنبية لي كاينة في الجهة لخرى.. ياكما تجي تفك علينا هد الحصار أمون كومنـ...
- C’est une bonne idée.. et alors?
- أنا غادي نطوع باش نوصلها داكشي لي بغيتو أمون كومنـ...
- Toi? hhhhh
- إييه أنا أمون كومنـ...
- Comment tu vas faire?.. وانت عارف بليnous cercle de touts les côtés notre ennemi.. وحتى حاجة ما كتزهق لو
- عارف.. ولكن أنا عندي واحد الفكرة.. يمكن إبليس براسو ما طيحش عليه أمون كومنـ...
- الله يسمعنا خير vas-y je t’écoute
- راسي هو ورقتك أمون كومنـ...
- Comment?
- غادي ندير لراسي الزيرو واكتب فيه الرسالة لي باغي نلحگ للشاف ديال هديك الكوبانية.. ونا را الغوفالة عندي صادقة مزيان بالزربة تنوض.. ومن بعد غادي نستخفى في شكل سارح ديال جمال.. وديك الساعة يقلبوني كيف ما بغاو حتى يعياو.. والله لطاحو على شي حاجة أمون كومنـ...
- Bravo Caporal Allal.. c’est génial اعتبر نفسك من الآن أنك منتقل لأي منطقة تبغي (لنفسه) Imbécile باغي يخسر لي الخطة.. غادي نكتب إعدامو فوق من راسو.. ونرسلو لعند الجنيرال pour l’exécuter.. Caporal Allal
- A vos ordres مون كومنـ... مون كومنـ...
- بلاش غير تبعني
- وافرحي وسعدي يا مريشتي هانا جاي
- Quoi?
- بلاش (يخرجان)


المشهد الرابع
(أصوات الحرب تخف تدريجيا)
- الشرجان عسو: (يدفع الكومندار بنحادة إلى الداخل) يلاه تحرك.. زيد گدامي
- الكومندار بنحادة: C’est pas raisonnable هدشي لي كدير Sergent Assou
- أييه؟ إوا أسيدي ملي توقف گدام المحكمة العسكرية عطيهم الدليل بلي داكشي لي كنتي كدير انت هو المعقول.. ونا ما تسالني غير الدعا.. بلحق عليك ماشي لك
- أرا لي بعدا غير l’uniforme نتاعي
- مازال زايد فيه؟ هنا تعرف بلي ما عمرك قدرتي قيمة هد تريي.. فين هو القسم لي قسمتي يوم لبستيه.. باش تحمي الوطن وتصون حدودو.. تنوض داب تخونو مع عدوه؟
- راه لحد الساعة ما عرفتش de quoi tu parles Sergent Assou
- والله انت ما راجل.. كون كنتي راجل بصح گع ما يسميوك على مك.. هداك تريي راه كيلبسوه غا رجال.. لي كيطلعو جبال وبلا حبال.. نهار وليتي كتمشي وحدك طل على لعدو شميت فيك ريحة لغدر.. ودرت راسي كانبو ما قاشع والو.. وسيدي ربي راه ما كيدير غا لي فيها الخير.. نهار بغى يفضحك الله.. طلبتي مني بنفسك نمشي لدبو ديال سلاح.. ودرت لك تقرير حتى حاجة ما صحيحة فيه.. وملي جبتو لك للمكتب ديالك.. زاد تأكد لي غدرك.. واش الكبانية كلها قتلها الجوع ولعطش.. وانت داير خزين عندك فيه غا ما لذ وطاب.. وملي سولتك گولتي لي حگا حگا احتياط.. احتياط غا علينا حنا وانت لا.. گالس تگرع علينا.. كنتي باغي ترسلنا طرانسفيري كلنا لعند عزراين گبل الوقت ياك؟
- de quoi tu parles Sergent Assou?
- داب وحدة من جوج.. غير درج معي ولا بارك علي من هد شلاضة لمجخلطة ديالك.. علاه مالها لعروبية ديالنا.. ناقصة رجل ولا عين؟ ولا الزيانية ولا الريفية ولا السوسية ولا الحسانية ولا الجبلية.. ولا كنتي باغي تهدر بلغة هدوك لي مبقاوش هنا.. سير گطع لبحر عندهم.. بلحق هدي هي اللخرى لك.. ماشي غادي تگطع غير لبحر.. غادي تعداه لهيه
- ها العار أسي عسو
- وليتي كتزاوگ.. شوف حالتك كدايرة.. صافي تقضاو لك؟ مالك على هد لمسخ ولوسخ كامل؟ علاش ما رجعش الكابورال علال لداب علاش؟
- ما نعرفش.. حتى أنا ما نعرفش.. والله
- هو لي كان عايق بك بلا ما يقصد.. تيگول ويعاود الكومندار دار دار.. وحنا ما جايبين خبار.. وماشي بعيد تكون صفتيها له.. أش من رسالة كتبتي له فراسو؟
- رسالة عادية.. فيها طلب الدعم من هداك الفيلق الأجنبي
- طلب الدعم ولا الإعدام؟ يلاه تحرك.. زيد گدامي.. أنت راك تقتل حتى مك على مصلحتك.. زيد گدامي (يخرجان)


المشهد الخامس
(يبني الشرجان عسو نصبا رمزيا من الأعواد للشهيد الكابورال علال، ويغطيه بزيه العسكري، ثم يقدم له التحية العسكرية. وحين يضع صورة مريشة عليه، يمر شبحها غير المبالي بموته بلباس العرس، فيتبعه خارجا)

ستار

عبد الرحمن الوادي
يناير 2011