عْلَى وُعْلَى
على من نقول هادشي
عليّ ولا عليك
كلامي راه كيْ رشِّي
وبه روحي تفديك
لي دخل بالو ما يَنْعسْشِي
يبات يخمم فيَّ وُفيكْ
فيه المكسي ما لَبْسْشِي
الطلب ليه من حالو يعطيك
والشبعان ما وكلشي
عطشان ومن كربتو يسقيك
الهم ماشي لي، لْ كلشي
لي تبغي تعاود ليه
بْ هْمُّو ينسيك
على سوسة الضراس
الساكنة داري
على مرض الهواس
المعانق جاري
على صمت الناس
ل الظلم الساري
على بالة وفاس
ما هدمت سواري
على لسان خراس
ضعيف ويداري
على ميزان تقاس
عواجلو ليه لْ مَّاري
على من يشرب الكاس
والعباد شاري
على من بنى بْ لْمَاسْ
دار عْلاَتْ وُجْلاْتْ صْواري
على من قطع الراس
وخلا الكسدة فُ كَارِي
........................
على وعلى كلام يرشي
لا حد يحسدك عليه
ظلم وظلام متفشي
لعدوك ما تبغيه
عامر خاوي بحال ل فرشي
الزمان لي داز كيديه
صحيح ف صيح ما وقفشي
نار لعدى بلهيبها تكديه
مرة ينطق مرة ما دوشي
حال وحوال ما تقش فيه
رياحو هادية ما تعصفشي
تخلي لبحر ساقر بلي فيه
على النور الغابر
ما ضوّ ليلي
على الخير الطاير
ف زمان الحيلي
على الشر الزاير
المقطع صيلي
على العبد الصابر
قايل ل دموعو سيلي
على من هو حاضر
ف موت رحيلي
على خوف المقابر
الملازم جيلي
على المكبل الصابر
ف سجون صمت صقيلي
على الفم الصاقر
لسانو معشش رتيلي
على الجيب العامر
وجيب وكيلي
على الحال الصاير
من عند منديلي
...................
على وعلى كلام يرشي
دموع فاقت البحر
لي يسمع ليه ما يكلشي
عيونو ب همها تسهر
صوت الريح ما ينفخشي
كلام الساكن لقبر
لي ما جوع كلبو ما ينبحشي
على من باع
وشرى ف لحمي
على حناش ولفاع
صبحت همي
على من هو راع
كمم فمي
على ساريا وشراع
غرقت ف يمي
على واحد كاع
ما همو كلامي
على ظلم شاع
وكنس علامي
على الحق لي ضاع
وضيع ايامي
على قومان ف صراع
بها تزاد سقامي
على الشر لي ذاع
ونسف حلامي
الرئيسية
موضوع: عْلَى وُعْلَى 
السبت 16 أبريل - 13:45
