يادَنْيَا انْتِ...

يَا دَنْيَا انْتِ
وَاشْ تْكُونِي
فْمَلْكْ الله

تْكُونِي جْمَرْ ...
رَاكْ گْدِيتِ
تَحْتِ
تْكُونِي بْحَرْ
رَاكْ غْرَقْتِ
فْبَرْكَتِ
تْكُونِي رِيحْ ...
رَاكْ طْفِيتِ
شَمْعْتِ
وَاشْ تْكُونِي
فْمَلْكْ اللَّهْ
يَا دَنيْاَ انْتِ...

تْكُوِني ضْبَابْ
غَطَّ شُوفْتِي
تْكُونِي عْذَابْ
كَمَّدْ حِيرْتِي
تْكُونِي سْرَابْ
بْزَهْرِي مْشِيتْ
تْكُونِي مَكْتَابْ
لْذَاتِي عَرِّيتْ
تْكُونِي سْحَابْ
بْشْتَايَ مَا صَبِّيتْ
يَا دَنْيَا انْتِ
واشْ تْكُونِي
فْمَلْكْ الله...

جَرْجَرْتِ هَادْ لَقْلَمْ
فُوگْ وْرَاقِيَ
حْرُوفْ
حْتَّى صَارْ
لْجَرْحْ دَمّْ
بْسْطُورْ كْلاَمِي مَعْرُوفْ
دَوِّيتِ
لْسَانِي بالهَمّْ
دَابْ رِيقِي فَالجُوفْ
وحْيُوطْ
الوَگْفَة غَمّْ
ورْحِيلِي
سْلاَمْ الخُوفْ
يَا دْنْيَا انْتِ
واشْ تْكُونِي
فْمَلْكْ الله ...

عَدِّيتْ بْخَطْوَاتِي
طْرِيقْ
ظْلاَمْهَا گَدّْ ظْلاَمْ
حْيَاتِي
كَفَّفْتْ شُوفَاتِي
ضِيقْ
عَشَّشْ فِيَ عُشّْ لَوْهَامْ
كِيَّاتِي
يَا دْنْيَا انْتِ
واشْ تْكُونِي
فْمَلْكْ الله ...

عْطِيتَكْ شْبَابِي
وَرْدَة
دْبَالَتْ بِينْ يِدِّيكْ
حَطِّيتْ عْذَابِي
رْهِينَة
بَكْمَالْهَا تَرْضِيكْ
فَرَّقْتْ صْوَابِي
عْلَى طِيفَكْ
يْغَنِّي لِيكْ
غَرْبَلْتْ شْبَابِي
فْگَاعْتَكْ
غَلَّة عَاسَ تَغْرِيكْ
يَا دَنْيَا أَنْتِ
واشْ تْكُونِي
فْمَلْكْ الله ...

رْكَعْتْ لَلْخَالَقْنِي
فَصْلاَتِي
رَكْعَاتْ حْنِينَة
وكْتَبْتْ لَلْسَّالَبْنِي
مَا بِيَ
مَنْ جْنُونْ وغْبِينَة
وسَلَّمْتْ لَلْحَاسَدْنِي
فْقَلَّةْ زَهْرِي
بدَمْعَة مَنْ هَادْ
لَعْوِينَة
وَلاَ انْتِ يَا دَنْيَا
فْهَادْ الدَّنْيَا
فَصْلاَتْ جْنُونْ
زَهْرِي حْنِينَة
يَا دَنْيَا انْتِ
وَاشْ تْكُونِي
فْمَلْكْ الله ...

خَلْخَلْتْ
زَغْبَاتِي صُوفْ
بِينْ قْرَاشْلَكْ دَمْعَاتْ
حَرَّكْتْ
تَخْمَامي حْرُوفْ
بِينْ كْلاَمِي فَتْيَاتْ
ذْبَحْتْ
المَا بْسْيُوفْ
فِينْ دَفَّگْ
صْبَاحِي مَشْيَاتْ
دَقِّيتْ الغَايَبْ دْفُوفْ
فِينْ غَرْبَتْ
شَمْسِي حَطَّاتْ
طْلِيتْ لِيعْتِي كْفُوفْ
فِينْ شَافَتْ
شْرُوقِي كِيَّاتْ
يَا دَنْيَا انْتِ
وَاشْ تْكُونِي
فْمَلْكْ الله...

حْرُوفِي
سَاعَة وْحِيدَة
غير

...حَنِّي فَيَاقْ رْگَِادِي
نْحَسّْ بِيكْ
حْبِيبَة عْلَى اوْسَادِي
صَدّْقِنِي فْوَقْتْ الشَّدَّة
وَشَدِّي سْلاَمْ انْكَادِي
بِينْ يِدِّيكْ
لْجَامْ حْلاَميِ
رَحْمِينِي نْهَزْ العَدَّة
وعَدِّي لْغَايَ تَعْدَادِي
بِينْ طِيفَكْ
خْيَالْ ظْلاَمِي
رَسْمِينِي بعْسَلْ الشَّهْدَة
وگَِطَّرْنِي
گَطْرَانْ رْگَادِي
بِينْ حَجْبَانَكْ
رْمُوشْ سْلاَمِي
يَا دَنْيَا انْتِ
آشْ تْكُونِي
فَمَلْكْ الله ...


شْكُونْ عَيَّطْ
ووَسَانِي
فْهَادْ لَبْعَادْ
وَاشْ قِيمَةْ
فْرَاشِي
بْلاَ بِيكْ وْسَادْ
وَاشْ تَسْوَى
هَادْ الشُّوفَة
فْمْرَاحْ جْنَانْ
النْكَادْ
وَاشْ تْكُونِي
انْتِ يَادَنْيَا
فْهَادْ الزّْمَانْ
الغَارَقْ فَمْكَانِي
بْلاَ مِيلاَدْ ...
يَا دَنْيَا أنْتِ
آشْ تْكُونِي
فَمَلْكْ الله...[/