آه منك يا زمان



آه آآه آآآه منك يا زمان

حيرتيني وانت فاني

كل ما نقول وقفت

تلوي رجلي

يعواج ظلي

نعثر ونطيح تاني

آه آآه آآآه منك يا زمان

نتعافر فيك ونتحابا

نتسنا الخير والصابا

نزرع حبة

نترجاها تسبل سبولة

بالزرع كاملة مكمولة

ملي توقف نلقاها معطابا

مريتلة بشواقر الحطابا

وانا فريد

مسركل بوحوش الغابا

ها اللي يركل ويرفس

ها اللي ينتش ويفرس

واللي عولت عليه

نشالي نعيط وناديه

سمح فيا ونعس

آه آآه آآآه منك يا زمان

ما خليتيني فحالي

نيرت وسديت

وهرستي منجج هبالي

توسوست ورشيت

وعدت خايف من خيالي

منو نترعد مرهوب

واش هكدا مقدر ومكتوب

من صغري وانا معطوب

زهري فيك مزغوب

ياك قريت

ومحيتي ليا لكتوب

مكوي بالقهرة

قلت الشي والحكرة

واش ما منك هروب

آه آآه آآآه منك يا زمان

عريتي ضهري للجلاد

السوط مملح

بالحر عليا هواد

سعدي فيك سقام

وما بغا يتقاد

آه آآه آآآه منك يا زمان

من غير لبو ولميمة

ما لقيت فيك أحباب

ومن غير الصحة والمال

ما تما خلان وأصحاب

رميتيني فعرا

وسديتي كل الأبواب

وآآه منك يا زمان آآآآه