لله يا هلي رحموني،

من قوالكم ، لا تعذبوني.

لا تكثروا عجبي لا تلوموني.

نترجاكم سمعوا كلامي فهموني.



كنت ذرية صغيرة في الدوار.

كانت ليا ضفيرة بحال لبنات الصغار.

نظل نرعى غنيمات الدوار .

نجري نلعب ما نجيب خبار.



تقدر وكتاب تشح السما.

تجوع لقبيلة ويقل الما.

تموت لغنيمات نبقى بلا خدمة.

حياتي تبدلت وفقدات البسمة.



أمي وبويا ناس كبار

العيشة صعيبة وحنا ا كثار.

هجروا لقبيلة وخووا و الدوا ر.

جينا للمدينة حيوط وصوا ر.



قال بويا لازم الكل يعمل .

الخدمة في المدينة هي الحل.

لا حرفة لا دراسة كيف نشتغل؟

بدا البيع فينا وبدينا ندلل.



أختي خدمت مع ناس فاس .

خويا خدم حمال وعساس.

وأنا كنت صغيرة بلا قياس .

قالوا ..دفعوها تتعلم عند الناس.



وهكذا خرجت للحياة بكري.

ما لعبت ما جريت في صغري.

وهكذا كتاب وكان زهري.

قاصيت لعذاب حتى نفذ صبري.



شغلتني أمرا جميلة سيارة وفيلا.

شعرها صفر طويلة وزينة .

تخرج تسهر كل ليلة وليلة.

أللي جا معاها من الفاميلة.



بقيت معاها سبع سنوا ت.

المال تعطي لبويا ومعاه حويجات.

قلت هذي هي الدنيا ليا ضحكات.

لكن أللي مقدر ليا أكثر مللي فات.



تدور وتقول ليا زيا نيتي وكبرتي.

وأنتي راكي عندي عز من بنتي.

أينا واحذ من هادوك بغيتي ؟

شوفي كيف كنتي وكيف وليتي.



صارت الدار عليا ديما عامرة .

وأنا شافية وساكتة وصابرة .

واحذ يحرك راسو لآخر بالهضرة.

وعلى شرفي بدات لمقامرة.



كثروا عليا الذياب من كل جهة .

ننعس يقولوا هرسوا الباب عليها.

يشربوا الشراب يقولوا جيبيها.

ياك حنا صحاب لاش سادة عليها؟



بدات فيا لمساومة كلا ومجهدو.

واحذ عطا مليون و بداو يتهاردو.

كلاب ما ينبحو حتى يوعدوا.

غواهم المال ما تعبو فيه ما كدوا.



يوم بعد يوم لكلاب عليا تحوم .

كل واحذ كادوه بيه يتقدم.

حياي خدشوه والفاهم يفهم.

قلبي عصروه وبكوه بالذم.



لمعلمة للاة مولاتي فرحانة بيا.

تقول ليهم جبت ليكم هدية.

غزالة ذمها طري وبدوية.

حكوا جيوبكم طلعوا أرا و ليا.



نسمع كلامها نبكي ونتألم.

النسا غدارة تقتل بلا سم.

تبيع كلشي وترشي بلا ذرهم.

تبيع السبع للقرد وما ترحم.



ألقيت الغفلة في يوم وهربت .

نجري في الزنقة ما نتلفت.

بعدت من الدار تودرت.

وبين يدين سمسار وقعت.



صدق من الذياب وكبير لكلاب.

أمنني تقت وعليا سد الباب.

حياتي تبدلت ودفعت لحساب.

كميت وشربت ولبست الذل ثواب.



وهكذا تقدر عليا وكتاب .........

نذوق المحنة ونعرف لعذاب....



واليوم نروي حكايتي

ونقول فينك يا بنتي ؟

كيف حالك كيف صرتي؟

ما زلتي حية ولا متى؟....

ما زلتي حية ولا متي؟.......

اخي الكريم الحسن عطاري جميل ما كتبت فهذه قصة اجتماعية تحصل في كبريات مدن المغرب
فبنات الارياف خادمات البيوت كثيرا ما يقعن في مثل هذه المشاكل تحوم حولهم الذئاب لتنال منهن مبتغاهم ثم يفصلهن عن عملهن فينعتهن بالسارقات مثلا للتخلص منهن و هذا حرام و لكن السبب هو الفقر و الجوع
تحياتي اليك اخي عطارى
محمد منار

الاخ الكريم الحسن عطاري كيف كنتي و كيف وليتيقصة الفتاة البدوية
التي تضطر للعمل كخادمة بسبب الفقر الذي تعيش فيه قصة نتعايش مع احداثها كل يوم مئات بل الاف الضحايا يباع و يشترى فيهم بسبب ظروفهم المادية .....
تحياتي لك اخي لهذا الطرح المميز
اختك اسماء مثلا