منتديات دواوين الثقافية و الأدبية

]

شحال صعيب

شحال صعيب
تعيش بين اهلك وناسك
وتحس ب راسك غريب
شحال صعيب
تضحي ب النفس ولْمال
ويكُولوا عليك محتال
شحال صعيب
تزرع وترعى لْبذرة
وتذوق حلاوتها مرة
شحال صعيب
تدير ف بنادم لْخير
أو تحصد منو شر مرير
شحال صعيب
تبني وتعلي
وتروح وتخلي
شحال صعيب
تربي وتْكبّر
ويجي نهار عليك يتجبّر
شحال صعيب
تدير الثقة وتبوح ب لسرار
تحس ب الندامة أوتشربها مرار
شحال صعيب
تمشي مع الناس ب النية
ويعاشروك ب فْعايل الحية
شحال صعيب
تدير لخاطر للناس
أو مايراعيوْ ليك إحساس
شحال صعيب
تشوف الظلم أو تكتم
وب عذاب الضمير ما تحس ما تهتم
شحال صعيب
تحيس الدمعة ف لْعين
وما تخليها تعبّر ف لحين
شحال صعيب
يوحل لحرف ف لجوف
يدير غصة ف لقلب ويكبر لخوف
شحال صعيب
تْخرّج لعيب م الفم
أو ماتعترف ب لخطإ وما تندم

نجاة احسايني س/أ/غ 7/10/2014

شكرا أختي الكريمة المبدعة نجاة احسايني على ماخطت يمناك تقديري واحترامي

ازرع البدرة واسقيها،سوف تنضج تكبر فتجحجح ثم تأتيها
طيورا من كل الجهات تبنين أعشاشهن بها...كان لك
خيرا جارا،لا تنتظرين جزاء من أحد اعلمي أنه قد سجل
في كتاب حسناتك.تحيتي أختي المبدعة.

سعيد محمودي كتب:: شكرا أختي الكريمة المبدعة نجاة احسايني على ماخطت يمناك تقديري واحترامي

دمت سيدي قارئا متميزا ذواقا للحرف.تحياتي

الضريسي الباز حسن كتب:: ازرع البدرة واسقيها،سوف تنضج تكبر فتجحجح ثم تأتيها
طيورا من كل الجهات تبنين أعشاشهن بها...كان لك
خيرا جارا،لا تنتظرين جزاء من أحد اعلمي أنه قد سجل
في كتاب حسناتك.تحيتي أختي المبدعة.

حياك الله سيدي ودمت طيبا .اشكر لك مرورك وبصمتك المؤثرة.تحياتي

» الولف صعيب
» لفراق صعيب