هنّيني ياراسي


كولني ياراسي
كول مخي
وخليني نفافي
شحال م نهار
فيقني م نعاسي
كبّر لي وسواسي
خلاني ف الهم نقاسي
كولني ياراسي
وخليني نعيش هاني
وعليا براني
ما نتوجع ما نعاني
ما نشك ف اللي سماني
ما نكُول داروها
بيا بلعاني
كولني ياراسي
باش نعرف من والى
نسوان ورجالا
نسايسهم وما نكُول
لا..لا
نعرف منهم لعزيز
وذلالة
ورد لبال مَ لحقير
ولحتالة
كولني ياراسي
وما تبقّي شي مَ لكَلب
لا تخليه معذب
كل نهار شايف لعجب
ما قادر يسكت ولا يْعَيّب
ما قادر يبني ولا يْريّب
كولني حفنة مَ ترابو
هو اللي غلط ف حسابو
تّكْوى ب لغدر
وهذاك سباب عذابو
ثيقتو ف صحابو
حيوطها رابو
دفني تحت التراب
وخلي نعيق لغراب
يعاود ما جرى م لكراب
راه فيه حكمة ما تنعاب



نجاة احسايني 20/5/2014