لمْخاض

حملت بيا ليام
وعشت ف ظلام
ساعتها م عرفت كلام
ولا شفت حْلام
جاني الزمان
عرض عليا
مكتوب اقداري
رسمها على جبيني
شافتها عيوني
قراها لساني
عليها وافقت
وما قلت لا لا
جا وقت لمخاض
لقيت راسي مدفوع
جارني ونا مربوع
طحت على فمي
ونا نزوي
فرحة ولّى خلعة
الله واعلم
لقيتني ملموم
وما عارف راسي
واش فرحان
ولّى مهموم
رضعوني من بزولة ليام
قطيرات
وفَ وْذاني كَالو
كليمات
شفتني نكب ونكبر
نفهم ونعبر
تعلمت ندوي
مْطارح ما مْكبّر
لّكلام ما نخصر
لّخواطر ديما نجبر
آه ياليام
وعلى زهر عطيتيني
سالب او مسلوب
جالب او مجلوب...
هذاك هو لْمكتوب
اللي شفتو وقريتو
وعليه وافقت
وخذيتو

نجاة احسايني 19/5/2014

جاني الزمان
عرض عليا
مكتوب اقداري
ــ ــ ــ
الزجالة نجاة احسايني ،
سفر استطلاعي عبر صور شعرية فيما يختزنه الاحساس
من مخلفات تصنعها الأيام بفضاء سوق الحياة ...
دام لك التميز ... مودتي