صهيل لحرف


كتبت حروفي
من عمق جوفي
كل حرف رضعتو
مْ بزولة صروفي
مازال يرضع ويتكلم
باقي ما تّفْطم
قاديتها وحطيتها ف رفوفي
هديتها ليك  ب كفوفي
طلبت منك سيدي تبصم
و تساير ظروفي
تركّب حروفي مع حروفك
صهوة المعنى
يتّسمع ليها صهيل
وقت التبوريدة
ولعاشق بَ لْغاها يميل
جوابك سيدي ما كان باين
خلى حروفي ليك تساين
السربة ما بغات تعاين
سلمت ليها حروفي
من بعد ما زَيّرْت لحزام
سرّجتها ب لجام
طلْقَت كلامها دخان
دَار ف السما غمام
شتاه سقات لَرْض
والصابة خَضْرَت لَعيان

نجاة احسايني 29/3/2014