الحلمة

بلا ما يشاورني
غفلني راسي
وحْلم شحال من حلمة
قلبت عليه ما لقيته
عيطت عليه ما سمعني
بالليل وهو ساهي
شقيتُه ودخلت
لقيتني بين السما والارض
طايرة نترعد
شفت لْتحت
لقيت شي حليمات
باقي ما كاملاتش
تتقاتل مع الليل
وقتاش يصبح عليها الحال
يرتاح ليها البال
وحملها ما يزيد يثقال...
وصلت ل طريق
مفرش بالشوك
مغطي بلغيام
ما شفت فيه غير الظلام
ف وسطه فارس ب لجام
من بعيد هازْ علام
ك يعاود شي كلام
ما يتفسر
ومولاه عليه ما يتلام...
باقي ك ندور ونجول
مالقى قدامي غير بحور
وسطها صخور
ف جوفها ضباب وبخور
بنادم فيها مشطون
تكُول عليه مجنون
يدور على نار ف الكانون
حسيت ب الصهدة
تمتم لساني وْخرَّف
بْ شي كلام مشقف
تململ راسي
ونا نطلع لفوق
كُلّي شُوق
آشْ غادي نشوف
طيور ف سمَا تْغرد
قوس قزح مْجَبَّد
العشاق تحتُه
كلْ ها وفين مْدّد
ف يدو غصن وحمامة
لحمامة داوية
هاذي علامة
خليوا لغصان ب جذورها
الطيور ف وكارها
خليوا لَحمام طاير
هنا ولهيه ساير
ماهو قاتل ولاجاير
شاهد على ما صاير...
الشعاع لْفح عيني
فاق راسي م نعاسو
مخلوع ب كباسو
كُلْت ليه:
آآآآآه ياراسي
عند بالي بالنوم مغلوب
ومانت غير متعوب
ليلك كله معطوب
راحتك شمعة كتدوب
نخاف تنطفى
ونقلب عليك
ما لقاك موجود

نجاة احسايني س/أ/غ 22/11/2013