كلام لعيب

كلمة لعيب عمّرها ما تحلا لي
جرحت قلبي وخلات فيه وشام
بسبابها تقطعو كَاع حبالي
ما بقى لي فين نزيد لكلام
طاح شاني بين قراني
ما بقيت نسمع غير كثرة لخصام
بين حقي ياربي يا لعالي
راضية بحكمك زين لحكام
نبات الليل ساهرة ك اللالي
نصهل كيف لخيل بلا لجام
قهرني الظلم ولحق مشا لي
الشمس ساطعة وعيشتي ف الظلام
الغمة قهرتني شفني حالي
الضحكة هجرتني وغرقت ف التخمام
طامعة ف لحبيب يهز لي هبالي
قسوة ليام وغدرو جابو لي التمام
ضاع صبري وخسرت راس مالي
كل مابنيت تاه وسط الزحام
تهد حيلي وبقيت ك لميت كُدّام غسالي
احلامي طارت وما بقات غير اوهام
دموعي سالت وشقاي ما بغى يسالي
سقام جسامي ورشات لعظام
ضربة منَّ وضربة من هيه ويا دلالي
آش بقى فيا من غير لحيرة عل الدوام
نْكلم راسي ونخاف م خيالي
الله ينجيك من بنادم وعفسة لكْدام
هاذي قصتي وبها نختم قوالي
وباقي نبكي عل لخدع وتخراب ليام

س/أ/غ 11/10/2013