منتديات دواوين الثقافية و الأدبية

الــســـاروت

بغى يحل باب بسروت مصدي
قال نجربو . و بيه غير نعدي
ظن راسو غدى يحلو بالزربة
يبقى حتى يشبع و يضربها بهربة
جابلو الله ، من بعد الباب زريبة
يدخل ليها من كل دريبة
ما ذكر بسملة ما قال سلام
غير مدرم بلا ما يهز علام
ما يدخلو عكار ولا كحول
وخي يهزم جميع لفحول
مطور ومرفح بقلة النية
و مزلوط من الولد والبنية
الساروت لي يحل هاذ الباب
عند عاقل رزين ، راجل شاب
مخبعو ف صندوق بلا عساس
ما خايف عليه . ثابت الساس
أ قليل النية ، ارجع على طريقك
غراضك عدوك ماشي صديقك
المحبة كنز ما يتباع ما يتشرى
وقصرما يترهن ما يتكرى
والساروت ما هو من حديد
ولا فضة ولا حتى ذهب جديد
ادخل لجامع وكون من المحظرة
كثير السمع و قليل الهظرة
لا تقول أنا حافظ كل فهامة
راك غادي دير ما دارت النعامة
سير ورا أصحاب المحبة لكبار
ولا تخالط غيرهم. لا تعطيهم عتبار
الأولين قلبهم بالمحبة عامر
والثانيين بلا بها عقلهم باير
ولا بقيت عاصي ومعنتت
غدي تشوف راسك مفرتت
إوى خذ بنصيحتي وفكر فيها
ابغ المحبة ، داوى روحك وتشفيها

حميد الصنهاجي
الخميس 10 أكتوبر 2013