منتديات دواوين الثقافية و الأدبية

الــعــتــبــــــــة

قالو لي : لازم تبدل العتبة
تكون كحلة ولا شهبة
قلت لهم: العتبة غير لعبة
وماءها معصر من الحلبة
* * *
قالولي : العتبة توصلك لبيت ضاوي
يلا دخلتيه ، تشم العود و الجاوي
قلت لهم :هي ف النهار حبس خاوي
و ف الليل فم بالشرار داوي
* * *
قالولي :العتبة جاه بين قرانك
تبيض بالحليب قلبك و سنانك
قلت لهم :تبغي تغلبك وتسد وذانك
تعييك ف الطلوع وتكحل لبانك
* * *
قالولي :العتبة عليها صورة فنان
شوفتها تهدن لوجع ف المصران
قلت لهم :زواقها من القطران
ورصاص ثقيل يوزن لطنان
* * *
قالولي :ضوها خف من ضوالشمعة
وطولها يتعدى طول الصمعة
قلت لهم :خايف تنزل مني دمعة
ولا تكون رخيصة بحال السلعة
* * *
قالولي :العتبة تخفف من لوجاع
تصونك في كل حضور وتوداع
قلت لهم : اليوم رها ثقب لسماع
القلب فرحان وف العين لدماع
* * *
قالولي :العتبة عكاز في الطريق
معاك خير من الولد والشقيق
قلت لهم :هي تافكرة ف البريق
يلما قتلاتك تدير ليك لحريق
* * *
قالولي : العتبة ف العمر وسادة
تفكرك ديما بواجب العبادة
قلت لهم :هي لفعة تحت السجادة
نهار فرحانة و أعوام نكادة
* * *
قالولي : العتبة دوا نافع
ف الرخفة و الشدة شافع
قلت لهم : هي سلوم راشي رافع
وخباز لبيت النار دافع
* * *
قالولي :كل باب كتسدو ف الحين
غمض. تكون من المرتاحين
قلت لهم :العتبة شقوقها مخوخين
حتى صانع ما سدهوه وخى باللين
* * *
قالولي :وصف لينا العتبة السابقة
قلت لهم : ف جلستها ومشيتها راشقة
ليا ، من بعد العالي ، كانت عاشقة
وحتى لليلة لفراق عينها كانت شاهقة
دبى كنشوف صورتها ف السما عالقة
روحي بروحها ف الجنة متعانقة
ورحمة مولايا بيا و بها لاحقة

حميد الصنهاجي
الخميس 10 أكتوبر 2013