كية لقلب اللي ما حسب نجوم
ولاسهر ليل
كية لقلب اللي شبع نوم
ولا فكر ف خليل
كية لقلب اللي ما تكوى ب صهد الشوم
ولا كَال انا عليل
كية لقلب اللي ف لغرام ما يعرف يعوم
ولا يطير ويركب لخيل
كية لقلب اللي لكَى راسو معدوم
ولا قلّبْ ليه على حْليل
كية لقلب اللي عاش ديما مهموم
ولا ثْْبَتْ وتْهَدّْ ليه لحيل
كية لقلب اللي فاق وهو مصدوم
ولا قدر يكَعّد لميل
كية لقلب اللي ديما عليه اللوم
ولا قاوم وعاش ذليل
كية لقلب اللي طاح وماعرف يقوم
ولا فاق وعاش بحال لهبيل
كية لقلب اللي ظن راسو مغروم
ولا فْطن وخلى لْما عليه يسيل
كية لقلب اللي ضحى كل يوم
ولا عاش وشاف نهار جميل
كية لقلب اللي تفضح مع لقوم
ولا دفع عليه لقال ولقيل
كية لقلب الرخيص ف السوم
ولا رفع شانو وبقى ثقيل
كية لقلب اللي ما يغامر ويهوم
ولا يحقق لمستحيل
كية لقلب اللي تالم بشوك الدوم
ولا تْقَوّى وعاش بهيل
كية لقلب اللي ما لقى من يهدي ليه مشموم
ولا من يكُولُّو انت جْليل
كية لقلب اللي لسانو مشروم
ولا عرف يكون اصيل
كية لقلب اللي ما خاف من ذاك ليوم
ولا ضرب حسبة لعزرائيل
نجاة/ح 1/10/2013