رزمة لكلام

ملّحت لكلام
كلمة كلمة
حرف حرف
نشرتو فوق بخارة
تحت جمرة رايجة
بْ لهموم كَادية
دازت يّام ويّام
تبدل لكلام
رجع كَديد عل الدوام
جمعتو ف رزمة
على كتافي
عشت بيها جوال
ما نا غير هداوي
ولّى مجدوب لحال
الى مشيت هي معايا
والى كْلست هي حدايا
هي طعامي وشرابي
ودوايا
بها يتقاد لحرف فِ لساني
مذاقو يحلالي
وما يتنسى لي
نذوَّق اللي معايا
شلى معاني مغمورة
ف رفوف ليام
مْشوقة لرخيف لحزام
باش تخرج من ضيق لجام
كَديد لكلام وخّى مالح
ف كل مكان سارح
لكل زمان صالح
ربيع وخريف
شتا وصيف
داوي عل لمحاين ولخوف
عل بنادم والظروف
عل لمكتاب وقلة لمعروف
محلاه وسط لمجمع
تذوقو تحس ب الدفا
تسمعو تشوف الصفا
تقراه تغرد ب لوفا
ما يخلي ف لقلب جْفا
شحال من كَديد منشور
صابر لحر الشمس
وصهد الدنيا
ما مكسور
ما منخور
جمر الدنيا ما يحرقو
موج لبحر ما يجرفو

س/ا/غ
23/9/2013