منتديات دواوين الثقافية و الأدبية

الضحكة مَ الضحكة

هجرتني الضحكة
قلّبتْ عليها فَ دْواخلها
ما لكِيتها
ترجيتها تزورني
وباش بغات تأمرني
خزْرتْ فيا
خزرة واعرة:
منين نبداك
طريقي ليك
ماهو باين
عامر ب لمحاين
ياك لاباس
آش كاين؟؟؟؟
شَفْت فيها شوفة لْمضيوم
اللي قلبو عامر هموم
غيضو ديما مكتوم
وْ لَبْدا مصدوم:
انا اللي ما وصل خطابو
ناسو عليه غابو
كانوا سباب عذابو
معهم غلط فِ حسابو
حيوط حلامو رابو
و لْفرح هجر كتابو
....
....
بكات مني الضحكة
سَيْلت دموع:
وااه ياقلبي فَ الناس
شحال انت مخدوع
عيبك ماهو مسموع
لمعقول اصبح مصنوع
وانت كُلَّك موجوع
....
ما خلاو سْريرتي صافية
ولا سيرتي نقية
خرجوني من عمق الاوكار
زوقني لبَشَر
عطاني ألف وجه ووجه
مَرّة صفرا ..باهتة
مَرّة ساخرة...ناقصة
ما تْعبّرما تحَس
غير تهلك
ولْخديعة تْدس
...
بغيت نكون كاملة مكمولة
فَ الاعماق مخزونة
ساسها الصدق ولوفا
الرضا والصفا.
تْنَهّدْت بلا قياس
من قاع الانفاس
وكُلت ليها بْ خيبة إحساس:
بغيت لّبسك وافية
ونحس بيك ف اعماقي
تجري صافية
بلا غيار
بلا مْرار
بلا صفار
بغيت نشّربك ماء صافي
بْ ريق ما هو جافي
يطْفي لي نار لعوافي
وبيك عمري يرجع وافي
...
من بعد ما عرفتِ لمحاين
كل شي ولّى باين
وْلا تْسولي آش كاين.
من بَعْد ما تشاركنا
لحديث ولسرار
زال كثير مَ لغيار
سكنت الضحكة الاعماق
ما بقى فيها زْواق
تمنات تزور صحاب الاذواق
اللي ما يعرفو
نفاق ولا شقاق
ويحضنوها بَ الاشواق

س/أ/غ2/9/2013

تمنات تزور صحاب الاذواق
اللي ما يعرفو
نفاق ولا شقاق
ويحضنوها بَ الاشواق
..
..
الشاعرة الجميلة نجاة
نص جميل بين غرابته وقفت انتظر ضجكتك العميقة الصادقة
مودتي الخالصة

zajjal esahra كتب:: تمنات تزور صحاب الاذواق
اللي ما يعرفو
نفاق ولا شقاق
ويحضنوها بَ الاشواق
..
..
الشاعرة الجميلة نجاة
نص جميل بين غرابته وقفت انتظر ضجكتك العميقة الصادقة
مودتي الخالصة

شكرا لمرورك البهي زجال الصحراء ولك مني ابتسامة صادقة على حروفك النبيلة والمشجعة

» الضحكة