لقفص الخاوي
نبدى باسم الله ، مولايا خالق لنام
وبعدو بالصلاة على محمد سيد لقوام
يغفر لي على نقصان ولا زيادة ف لكلام
ويعاوني على حالتي ل عرفات الصيام
من يوم خوى قفص كان فيه ك ينام
طير. ما هو باز، ولا حمامة من لحمام
كان ونيسي ف النهار وحتى ف لحلام
روحنا كانت بحال الشقايقات الثوام
حيث الحب الشريف ، كان بينا لمام
طير سخي ، ما وصلوه هدوك لكرام
ما سبقو ف الخير طيار ولا عوام
يحن على حاملة ف أيام التوحام
ف كلستو، ما خاوية بلاصة بالزحام
كلشي تشكر به ،حتى الكذاب والنمام
وحبوه الصغار والناس الجداد و لقدام
هداني زوج فلالس بقوة لحكام
صورتو مثبة ف قلبي بحال لوشام
غيابو ، لبسني جلابة كحلة بلا كمام
وليلي مع نهاري تخلطو بالتخمام
سولت عليه لقريب ولبعيد من لريام
العصريات وحتى ل بالحايك واللثام
ومن الرجال ، كان فقي ولا إمام
قالو: رجوعوما يمكن بسحار أوعزام
يا أهل مكناس ، يا العارفين بالغرام
نصحوني بوسيلة نحيد بها لغمام
دمي تخلط من الراس حتى لقدام
ما يصفيه طبيب ماهر ولا حجام
الصبر تهد ف خلوتي بلرصام
يلي خلقتني وخلقت جميع لنعام
جعل كلامك ف لساني خير لنغام
يوم القيامة ، نهار تيبس لقلام
من غيرك ، ذنوبي ما يغسلها حمام
ما نقدر على عذابك، وخى يوزن غرام
وعندك ، تبيض روح حميد بعد التمام
حـمـيـد الصـنـهـاجــي
الخميس 20 يونيو 2013
الرئيسية
موضوع: لقفص الخاوي 
الخميس 20 يونيو - 22:23
