كلام لحال

نطق لساني بكلام لحال
بعض الناس ما عجبهم لمقال
على لساني داروا لجام
غصبوه ومنعوه م لكلام
شحال ضحكت بلعاني
وشحال كتمت من احزاني
سالت دموعي من جفوني
نطقت حروفي من عيوني
كَالت معاني ومعاني
ربي سيدي آش داني
نعاشر قوم كلو شؤم
ب الزور والبهتان انت عزيز
النية والنخوة تخلف ودْبيز
شنقوني بحبل مبروم
طوقو بابي بقفل وزكروم
قالوا حقة كلامي كَ يْعادي
واللي سمعوا ياخذ عنادي
لغايا شوك وْقَف غصة ف حلقهم
واحلامي نار حرقت هيبتهم
قالوا عليها خواض ف خواض
ما تجلب غير الصداع وكثرة النواض
ما نا غير واحد من هاذ الزمان
حياتو مرارت وما بقى يحس ب امان
حلم ب لفرحة ف عيون الناس
تمنى يعيشها لحظة ولاباس
غربان السما ظلمو لقلوب
كحلوها وعمروها ذنوب
جيوب عمروها وخلاوا لبلاد
هلكوا لعباد والرعاين ولاوْ اسياد
قلامي ودوايتي ما يتلجموا
كرامتي وهيبتي ما يتهدموا
قطعوا اللسان هدموا لكْدام
وصوت الحق مرفوع عْلام
س/أ/غ 29/4/2013