تبوريدة

الكلمة ف هاذ الزمان
ما تحسبها غير بردعة
فوق حصان جوال
مثقلة ب شلى معاني
مأصلة ومشقفة
حروفها يلزمها
لجام وقت التبوريدة
عجاجة ف الارض
عجاجة ف السما
شوف يا بوعيون
اسمع يا بو وذنين
آش جاري
آش طاري
ليا وليك
ونا وانت ما داري
الموسم شاعل
حرفو حار
كلامو نار
معانيه كانون كَادي
افهم آلفهم من بعيد
والى قربتِ تشويك
عنداك تعميك
وللهاوية تديك
وترميك
راه حد مايجيب
ليك خبار
وتعود تنزار
بشمعة كَادية
ف قبة خضرا
ف ساعة الحضرة