وزان عروسة بين الجبال جالسة
بوهلال مقابل بوعقيقة و بوهلالة ناعسة
وعين الله لي ما تنام عليها حارسة
انا غدي نطوف على وزان حفيان وراني حالف
من لعدير للرويضة لجنان علي لبوسوالف
ومن القشريين للرمل لعين بوخطاب لبوخالف
يلا كان الزاد وسامحو لجواد والحمل خفيف
غدي نزور مولاي التهامي ومولاي عبد الله الشريف
وف سيدي علي بن احمد نطلب اللطيف
ويلا كان الحمل ثقيل وكتفوني الجواد
غدي نطلب التسليم ونرجع خديم ونولي حداد
نصنع السيوفة وندافع عل البلاد
بلادي بلاد العفة والبركة
ومالينها طيبين وقلوبهم ملاكة
مسالمين شرفة طالبين السلاكة
خيرات بلادي صوف وزيتون
والتين بكل الانواع ولون
الفن والطواجن النزاهة والملحون
ياك عاقل زمان ا الخاوة
من كان سي بوعياد داير فلسطين فللا زواوة
ولي مريض بالوسواس يجي عندو يداوة
الوزاني واع يتكلم معك بالمعون والقافية
كريم جواد يعطيك بلا حساب بالصحة والعافية
وخ المدخول قليل البركة فالكافية
اما الوزانية دجاجة قروقة
ومنقارها نحاس
يلا شافت فيك شوفة مسروقة
تعدبك وتبات بلا نعاس
الوزانية عفيفة خلوقة
يلا عاملتيها مزيان تحطك فوق الراس
زوجة صالحة مرزوقة
صبارة ما تسمع لكلام الناس
عزالدين بلفقيه

شكرا اخي عبد الاله على مرورك الكريم وعلى دوقك الرفيع

حفظك الله ورعاك اسي ابراهيم توحشناك