منتديات دواوين الثقافية و الأدبية

انا وراسي

بغيت شي نهار نفيق
ونلقاني ماشي انا
وجهي ماشي ديالي
دواخلي مبدلة
على حساب لوقت
سولني راسي
شكون انا؟
فين مشيت؟
على دواخلي علاش تخليت؟
كُولت ليه ياراسي:
حسيت براسي براني
وحداني
قلبي ما هو مَ ترابهم
ضحكي ما هو ب نيتهم
نيتي ماهي ب حالهم
لعين تشوف فيا كِ لغريب
كثرة كلامهم انا ما قديت
خاطري عليهم ما بغى يطيب
بغيت نضرب تَلَفَة ل راسي
نبدل جوابي
نقسح حروفي
نبًت انيابي
نربي اظفاري
نمَضِّي لساني
اللي عطاني نعطيه
اللي عماني نعميه
اللي دركْني بخيط
ندركُو بحيط
هكذا بغانا لوقت
هرب مني راسي
تخاصم معايا
بعًد مَ حدايا
بكى عليا وكَاليا:
ثوبك ما هو من ثوبي
نلبس قدي يواتيني
ما نجرجرو ما يجرجرني
كُلت ليه:
انا وانت عملة وحدة
ما تباع ما تشرى
ما تْزوَّر ما تْصوَّر
ماعندي لاين عليك
ما عندك لاين عليا
ضحك راسي على راسو
وبالفرحة بانت ضراسو
ونسينا لهم وناسو

س/أ/غ 26/2/2013

r]

الله عليك الزجالة والمبدعة المتألقة نجاة احسايني
كنت هنا غاية في الروعة والتمكن
أراك تسلكين طريق القمة بخطا عملاقة تابتة
تبارك الله عليك ولهلى يحرمنا منك
تحياتي لك وتقديري لشخصيتك الابداعية

علاش بغيتي تنسى راسك
علاش بغيتي تغشي ضراسك
علاش بغيتي تبدل لباسك
روي شجارك وغراصك
وخليك عسل ففم ناسك
وخلي الحياة حلم زين فنعاسك
حفظك الله ايتها المبدعة الفنانة نجاة