العود المحكُور

العود اللي تحكرو
عنداك يعميك
نوصيك ياالداير بيه
حضي راسك يديرها بيك
لاتحسب جناحو مكسور
وطيَّح عليه السور
راه بجناح واحد يثور
يعميك ويخليك تدور
لا تكُول عليه وحيد فريد
تحكَر عليه وتزيد
راه يتعلق ولو بجريد
يعثرك فيه وتعود مريض
لاتحسبو لقمة ساهلة ينْدق
راه يتحول شوكة ف لحلق
يوقف غصة ويخليك تعُق
لاتظنو جاهل وضعيف
ما يعرف البا مَ الليف
يقدر يكون راسو مغلف
بشلى حكايات وحرف
لاتكُول عليه شايب عايب
حياتو كلها مصايب
راه يورطك فْ شلى كذايب
وتعود فْ حبالو دايب
بالك تعتبرو قليل فهامة
وضحَّك عليه جماعة
راه يعيق بيك وينوَّض ليك قيامة
وقتها تخسر نفسك وتحس بَ الندامة

س/أ/غ 27/2/2013