شاع لخبار
فَ الدوار

رجع الحراك للدار

وجاب معاه الدولار

تجمعو ناس لقبيلة

نمشيو لدويرة

نشوفو عْمار الحراك

علاش رجع من برا

واش دار لوريقات

وجاب معاه لمرا

واش قتلاتو العيشة المرة

ولا قهرتو الوحدة والحكرة

عْمار الحراك

ضيف ناسو فَالدار

وبدا يحكي لهم لغرايب ولسرار

قضيت ليالي طويلة

مليانة تخمام

دموعي سيالة

ونا نكابر الهم وْندمان

قضيت من حياتي عامين

تمرمت بين الرجلين

خدمت عند اليهودي والنصراني

ظهري تقصم وطابو لي اليدين

فين ما مشيت لفظوني

عربي انا ومسلم منين يسمعوني

العنصرية فْديك لبلاد طاغية

والرحمة مَ لقلوب زايلة

الوقت عندهم مَ يرحمش

وقلة الدين عند بنادم وكاع مَ يحشمش

بلا وراق انت ميت حيْ

يستنزفوك ويكو يوك بنار الكي

ذكريات اليمة عشتها

لميمة ولبلادعَمرْ مانسيتها

عييت نصبر وصبري طال

ترجيت الخير وخيرهم زال

توحشت الجورة وصلة الرحم

وريحة لبلاد وبكيت الدم

بالليل بالنهار طار نعاسي

الايام كلها عشتها ونا نقاسي

نوصيكم من الهجرة ياناسي

اللي ما جرب ما فهم

اللي ماقاسى ما تعلم

اللي ما بعد ما تالم

لحريك دربو صعيب

ينسيك فْ كل حبيب

ويبعد عليك كل قريب