خواتاتي يالي مسحتو دمعاتي
ونورتو بدعواتكم حياتي
ديما نلقاكم فضحكي وبكايا وشكواتي
راكم طرف من قلبي وذاتي
مابغيت نزوق كلام لتضيع المعاني
كيفما عرفتوني لي فقلبي على لساني
جيت نشارك همكم كيف شاركتوني فمحاني
حبيت نشكر كل واحد فهمي واساني
يا فاطنة راكي فالقلب ساكنة
ماخليتيني وحدي ديما لحضورك ضامنة
تعقليني وتواسي وديما لعقلك شاطنة
يا أسما صبري على المكتاب راه الدنيا مقسمة
كيف تسد باب يتحلو ابواب ونشوف على وجهك البسمة
غدا يندم لي نساك ويبكي على ضياع النعمة
ياحياة جمرتك لقلبي كوات
نتمنى عقلك يحضر وتتعلمي ملي فات
لي دمرو الزمان ماتداويه يا ختي الدمعات
انتم خواتي لي ضرتكم ضراتني
ولي مساتكم راها فالقلب كواتني
ما ننساكم لو الدنيا لاهاتني
وفطرقانها جلاتني
انتم الاصل والمحبة والساس
انتم تاجي لي نحطو فوق الراس
مايهمني من غيركم لا مال لا ناس
فرحتكم تفرحني وبكاكم يسرق من عيني النعاس
فمحنتي ما خليتوني
من حنانكم وحبكم ما حرمتوني
داويتو جراحي وفقلبكم صنتوني
نهار طحت مديتو يديكم و وقفتوني
ربي ليا يخليكم ويعطيكم لي يرضيكم