وخزتيني بسفافد حديد فقلبي وزيدتيني فعدابي
وهدرتي دمي وسالت دموعي سواقي وعيون
كويتيني بنار كاديه وشفيتي فيا هلي وحبابي
ونا قلبي حازماه بهمي وحزني فعيوني مدفون
حبي ليك يا ولدي وكبدتي هما سبابي
حتى بهدلتيني وشوهتيني ونسيتي انا شكون
ياك تسع شهور ونا صابرة وساترا عيوبي
ما عندي كانا الثقل والوحام مسمار فداتي مسجون
عاماين ونا نرضع فرحانة بيك مفرشة الورد والزرابي
حامياك من كل شر ومن كل داء قاتل ملعون
واليوم تكادو الكتاف وسممتي لي شرابي
ونعتيني بكل كلام جارح ورجعتيني شيفون
بخنجر السخط طعنتيني انا لي ضيعت عليك شبابي
وتمنيتي موتي وخ فديتك بحياتي وعاندك العربون
ما راعيتي لبزولة ومياة عرق لعطاوك حليبي
ما راعيتي لكلام الله لوصا عل الام فالكتاب المكنون
واش نسيتي بسبابك سامحت لبوك وستحليت ترابي
وخ الجرح كان غارق خلا القلب مغبون
واش نسيتي ما قاسيت وما بكيت من تخونت بابي
انت وباك ومراة باك كونتو تلاتي معفون
تلاتي الحقد والسم والنفاق هادي ماشي ترابي
ياك ما تتقرقب ونا ما جايبا خبراو تتضرب السيلسيون
انا ما مسامحاك وراني عارفة بلي هدا مكتابي
انا ما مسامحاك وخ البغلة تولد والنخلة تعطي حب الزيتون
ما مسامحاك

أبدعت أخي الفاضل الاستاذ عزالدين بلفقيه
سلمت لنا يمناك على كل حرف خطته هنا
لك ودي وجل تقديري

شكرا للاخوين ابراهيم وسعيد على مرورهما الكريم وعلى تشجيعاتهما المتواصلة لكما مني الف تقدير وتقدير

تحية المحبة الصادقة والوفاء الخالص
صديقي العزيز
شكرا لك على هذا الطرح الزجلي المنظوم ــ والمنغوم ــ
ذا الطابع الانساني