هزيت عيني للسما وبكيت
من يوم يابابا لي مشيت
بين دموعي وذكراك بقيت
شوقي ليك ما نقص وجروحي ما برات
وروحي بين السما والأرض تعلقات
يا الطيور لي طارت فالسما وعلات
مصابكم ليا خبر من بابا تجيبو
مهما مرت السنين القلب باقي فتعذيبو
ماارتاح قلبي ياطيور من نهار راح حبيبو
يا طيور قلبي عليل
من ليعت فراقك يابابا سهرت الليل
وفغيابك ياما شفت الويل
بقيت مهمومة وكاتمة دايا
ما يعلم بلي فقلبي غير ربي مولايا
حتى الشجر والحجر سمعو بكايا
اليتم جمرة فقلبي كواتني
وحدتي للعذاب والقهرة رماتني
نسيت البسمة والهموم هداتني
حياتي من بعدك ليل مضلام مالو صباح
وقلبي المكسور علمت فيه الجراح
تمنيت يابابا نعانقك ونرتاح
قلبك الحنين غطاوه بالتراب
وانا بقيت عايشة وحدي فالعداب
بكيت وبكيت حتى قلبي ذاب
ما بقالي حد قالدنيا غير اميمتي
هي اللي حاسة بكيتي ووجيعتي
اما الخوت يابابا حد ما حن حد ماشاف لجيهتي